Ra-Jeannot

04/05/2013

Diabe manara-penitra (tohiny) Fa nandritra izany fotoana izany indrindra no nisy niantso an-tariby ingahy CT ka nanome toromarika tamin’ny tanany, ny olon-drehetra tao amin’ny “salon” mba hangiana avokoa. “Bon! Henoy tsara aho! Kandidà ny president Rajoelina ary efa neken’ny CES!”, hoy izy nidehadehaka toa ny fanaony. Nihoraka daholo indray ny iray trano; mihoatra lavitra noho ny tenin’ny Soratra Masina mantsy ho an-dry Fôsy mianakavy ny teny mivoaka ny vavan’ingahy CT. Noraisin’i Fôsy ilay tavoahangy J&B ka dia noteteziny ny veran’iro vahiny rehetra. Fahasambarana tsy roa aman-tany ho an’ireto olona ireto tokoa mantsy izany filatsahan-kofidian’ny filohan’ny HAT izany. Mitohy miaraka amin’ny fihitaran’ny Tetezamita tokoa mantsy ny bizna ary izay bizna.

Nangidy tanteraka ny roran-dRajeannot nandre ity vaovao mahafaly ireto fianakavian’ny mpanongam-panjakana ireto. Ny filohan’ny HAT no nahavery asa tsy fidiny ny tenany, loharanon’ireo fahoriana maro nianjady taminy nandritra izay efatra taona izay. Izao indray koa anefa mbola kandidà amin’ny fifidianana filoham-pirenena ilay nitarika ny olona hidina an-dalambe, nampirehitra an’Antananarivo sy namoizana ny ain’ireo olona an-jatony maro nandritra iny 26 janoary 2009 iny. Vao miha nitombo ny fankahalan-dRajeannot ity zaodahiny. “Izao tokoa izany ilay hoe mifaly amin’ny fahorian’ny hafa!”, hoy Ra-Jeannot nanaiki-molotra.
Dia samy nanome rariny ny filohany teo avokoa izy mianakavy; ilay CT aza moa nahavita niteny mihitsy fa efa nahafantatra io fanapahan-kevitra io mialoha hono ny tenany. Te hoderaina e! Naniraka ny mpiasany avy hatrany i Fôsy, hanampy ny sakafo sy ny zava-pisotro, hanamrihana izao fahasoavana notohanam-potsiny izao. Milalao vola tokoa aloha ireto mpitondra sy ny forongony ireto e! Tanteraka ara-bakinteny mihitsy ilay fanovàna nampanantenain’ny filohan’izy ireo teny an-dalambe. Ny efa nitsangana nodorana sy norobaina; ny ambany tanàna natao fitaovana ary ho fitaovan’ny mpanao politika mandra-pahafatiny; izy rehetra kosa mameno paosy.