Diabe manara-penitra (tohiny)

06/05/2013

Lasa nifampitaritarika nanohy ny arôzazy tany ivelany tany ry Fôsy sy ingahy CT sy ireo namany. Efa samy “azoazoany” avokoa izy rehetra; nikasoka teo amin’ny sisin’ny vavahady mihitsy ny ilany havanan’ny fiaran-dRafôsy vokatry ny hamamoany. Olobe eto amin’ny firenena moa ireny ka sarotra ny hiteny azy; azy ireo ny fahefana sy ny vola. Ra-Jeannot irery no nolatsain’ireo rindrina efatra tao amin’ny “salon”; Charline kosa revo mandamina ny latabatra sy ny seza avy nilanonan’ingahy CT sy Fôsy vadiny. Fantatry Charline tsara fa tsy hody alohan’ny amin’ny 6 ora maraina i Fôsy; tsy miafina aminy ihany koa fa misy vehivavy miandry am-badiny any ambadika any.

Mbola te hihinana mafy ireo tonon’akoho sisa tsy lany Ra-Jeannot, menatra ihany anefa ny hiteny izany, ndrao hataon’ny olona hoe tendan-kanina eo. “Mbola ho ela isaka vao hisakafo ry Jeannot an! Izao mihitsy aho vao hanonon-kanina sady mbola hanasa ireto lovia sy vera. Sao dia mbola hihinana ireto akoho ireto aloha Jeannot e?”, hoy Charline. Mody tsy taitra mihitsy ranamana namaly izany; niandry vava latsaka hoy ny fitenenana: “tsy manina ary e! Apetraho eo fotsiny dia mihinana tsimoramora eo aho!”. Nadio tao anatin’ny iray minitra ny lovia nisy ireo tonon’akoho; ny taolana faran’izay mafy sisa tavela. Tamin’izay fotoana izay indrindra anefa no nandrenesan-dRajeannot ny anabaviny miresaka an-tariby tamin’olona. Azony an-tsaina avy hatrany fa tsy Rafôsy velively io miantso io ary tsy maintsy lehilahy. Toa hafaliana ho azy indray aza ny nandre fa manan-drafilahy i Fôsy, te hiteny amin’i Charline hoe “faizo any mihitsy ry bavy a!”. Nihazakazaka namonjy ny efitranony i Charline, nisolo akanjo vetivety dia nivoaka ny trano. “Misy zavatra halehako vetivety ry Jeannot fa mba andraso tsara ny trano a! Lasa nividy zavatra hono izy raha sendra tonga tampoka eo i Fôsy”.
Naka toerana tsara nijery film tao amin’ny “salon” Ra-Jeannot. Azony antoka fa tsy ho vita ao anatin’ny ora iray ny zavatra nalehan’i Charline. Nitsiry tampoka teo anefa ny sain-dratsiny dia ny hisava ny entan’i Fôsy ndrao misy antontan-taratasy manazava izao harena be tao anatin’ny indray mipi-maso izao. Tsy eken’ny sainy mihitsy ny zava-nanjo azy noho izao krizy izao. “Nahoana ny bandy no lasa 4’mi noho ny nataon’ialahy isany, dia ialahy indray no miseho deba be eto amin’ny tanàna eto!”, hoy izy tezitra mafy.