Diabe manara-penitra (tohiny)

07/05/2013

“Saika tsy tafavoaka tao an-trano aho. Soa ihany fa lasa nandeha niboraingy niaraka amin’ireny mpanao politika ireny ilay tsy misy ilàna azy iny. Efa natahotra mihitsy aho hoe hitohy mandra-maraina ny revin’izy mianakavy. Nilatsaka indray nge hono le Andry Rajoelina e! Dia lasa nanao arôzazy any ry zareo. Ny anadahiko izao no miandry trano ao”, hoy Charline tamin’ity sakaizany. “Iny vadinao iny aloha dia hahita loza rehefa mianjera io fitondrana foza orana io e! Te hiteny zavatra betsaka amina aho. Fantatro daholo ny zavatra ataony rehetra ary iny CT iny mihitsy no miray loha aminy amin’ny afera maizina”, hoy François sady nilalao ny felan-tanan’i Charline.

“Inona koa no hiraharahiako an’izany! Izaho koa tena efa leo ny toetrany mihitsy nandritra izay naha mpanam-bola azy izay. Tsy mody an-trano na mamo tampon. Tsy misy fiainana intsony mihitsy ny anay fa dia miray trano sisa. Tsoriko aminao fa manafina vola foana mihitsy aho izao hitsinjovako ny ho aviko”, hoy hatrany i Charline.
Ra-Jeannot kosa amin’izany ora izany, mikarokaroka ny entan’i Fôsy, manantena ny hahita zavatra. Sady mangovitra ihany izy eo am-pisavana ilay kitapo hoditra tao anaty larimoara. Tafapetraka mihitsy ranamana raha vao nanokatra ilay kitapo. “Ahy ialahy androany ry Fôsy! Inona daholo ireto taratasy ireto leity e? Bois de rose! Mpanondrana bois de rose kay le matin-kambo iny. Izay izany no mahafaly azy amin’izao filatsahan-dRajoelina izao mba hitohizan’ny fihinanan’izy mianakavy », hoy Ra-Jeannot tezitra mafy. Noraisiny an-tsoratra avokoa ny nomeraon’ireo kaontenera voasoratra tao anatin’ireo antontan-taratasy izay rehetra noheveriny fa ilaina. Naveriny tamin’ny toerana nisy azy ilay kitapo, dia iny izy no nivoaka ny efitrano.
Mailomailo sady kaodikaody izany anefa Rafôsy tamin’ity indray mitoraka ity. Toa misy mibitsibitsika aminy izany hoe “ndeha mody”. Ny revy anefa mbola tena mafana; ilay sakaizany rahateo vao avy nandahatra hira maromaro. Nahazo vahana nandritra ity krizy ity mantsy ny karaoke. Saika hahitana izany avokoa ny elakelan-trano rehetra manerana ny renivohitra. Nanomboka sorena i Fôsy ary tsy nisy niditra tamin’ny lohany intsony ny lanonana. “Inona no blem ialahy ry zandry a? Avelao any aloha ny resaka kandra fa arôzazy zao!”, hoy ingahy CT. “Non! Ça va! Ohatra ny tsy en forme kely zany a teo. Be loatra koa le charcuterie laniko dia lasa ohatra ny masin’aty izany”, hoy i Fôsy, niverina naka toerana tsara sady nampiakatra ny verany.