Ra-Jeannot

08/05/2013

Diabe manara-penitra (tohiny) “Ndao amin’izay hody fa tena reraka be mihitsy aho izany”, hoy i Fôsy tamin’ilay sakaizany. Tsindrin-daona te hafantatra izao mistery manakorontana ny saina izao mihitsy ny tenany. “Maika hamonjy an’ilay ramatoa be nga izato izy no tsy mahatombona tahaka izao? Ndeha ianao raha handeha fa izaho mbola hijanona; tsy hisy hanatitra eo ihany ve aho rehefa lasa ianao!”, hoy kosa ilay andriambavilanitra. Vao mainka nitombo ny adin-tsain’i Fôsy nandre izany. Tsy izy irery tokoa mantsy no manam-bola. Tsy vitan’izany fa tovolahy tsaratsara endrika sy manan-katao avokoa no tao amin’ilay karaoke tamin’ity indray alina ity. Azony antoka fa raha vao manao fahadisoana kely eo ny tenany dia efa eny am-pelatanan’olon-kafa ity zazavavindrano ity. Tsy mifanentana mihitsy mantsy izy roa; ny herin-dravola fotsiny ihany no niarahany tamin’i Fôsy; ny ankoatra izay….zéro!

Voatery nanaiky hijanona niandry ny sitrapon’ilay sakaizany i Fôsy. Nanomboka nanao fihetsika hafahafa koa mantsy ity farany. Nahiliny teo ambony feny ny tanan’i Fôsy, nitsangana nandihy nampidera ny vatany tamin’ny olon-drehetra tao amin’ilay karaoke izy. Mba nitsangana nanampy azy teo ambony sehatra ihany koa ireo tovolahy bôgôsy ka dia velona ny dihy miendrika vetaveta. Raha azon’i Fôsy natao ny nitifitra totohondry sy namono ireto andian-jatovo mamiravira ny sakaizany ireto dia efa ela no raikitra ny sakoroka. Toa zanaka henjana eto amin’ny tanàna koa anefa ny fijery azy ireo ka naleon’i Fôsy nanapitra ny whisky tanaty verany. Ampy ho fampitandremana azy ny fahitana ireo VW Touareg sy Porsch Caynne’s nentin’ireto tovolahy bôgôsy ireto.
Efa ora iray sy sasany mahery izao no niakaran’i Charline sy François tao amin’ny “chambre”, mbola tsy manana eritreritra ny hivoaka tao mihitsy izy ireo raha ny fahitana azy. Efa azon-dramatoa antoka tsara mantsy fa tsy tafody alohan’ny amin’ny efatra ora maraina izany i Fôsy rehefa mivoaka alina tahaka izao; izay mihitsy aza no mahita raha iray hotely ihany izy mivady saingy sarahan’ny efitrano fotsiny ihany! Ra-jeannot kosa renoky ny torimaso teo am-pijerena télé. Niraraka nanaraka ny saokany ny rorany, nihanaka nameno ny salon ny fofon-tongotra. Samy manana ny anjarany tokoa ny olombelona. Ao ireo mihevitra fa ny vola no maha rangahy, ny sasany kosa mametraka ny fitiavana ho zava-dehibe ka izay hitany sy tsapany fa mahakolokolo izany no hiantefan’ny fony. Mba inona ao anatin’izany rehetra izany ny an-dRajeannot?