Ra-Jeannot

10/05/2013

Diabe manara-penitra (tohiny) Ny tabataba sy ny horakoraka tany an-tokontany no nanaitra an-dRajeannot tamin’ny torimasony. Olona mifamono sy mifanompa no tazana avy teny am-baravarankely. Nazeran’i Fôsy tamin’ny tany i Charline ary mbola narahany daka sy hitsaka teo amin’ny kibony. Tsy zakan-dRajeannot ny nanatri-maso ny anabaviny niharan’ny vono nataom-badiny ka dia nivoaka avy hatrany ny tenany. Toa nomen’ny vintana fotoana hamaliany faty an’ity zaodahiny rahateo izy. Raikitra koa ny totohondrin’izy roalahy, nanome vahana azy indray aza ny famporisihan’i Charline nanao hoe “vonoy any mihitsy io ry Jeannot a! Te hanao kanefa tsy mahazaka; iza no tadiavin-tena hiaritra izay tian-tena atao isan’andro eto!”. Vaky ny orona sy ny vavan’i Fôsy, voa mafy teo amin’ny masony havanana koa anefa Ra-Jeannot. Nihazakazaka namonjy ny fiarany i Fôsy, namelona maotera ary lasa nitsoaka. Izy mianadahy kosa niezaka nifamonjy sy nifampibata niditra ny trano.

Niverina tampoka anefa ny sain’i Charline sady niteny tamin-dRajeannot hoe: “mandeha ianao mandositra haingana. Siora mihitsy aho fa lasa nandeha niantso ireny commando mpiaraka aminy ireny i Fôsy. Indreto misy iray tapitrisa ariary ento ho anao any aloha mandra-pahitana izay tohin’ity resaka ity. Haingana Jeannot a!”. Tsy nisy dinika azo natao intsony teo anatrehan’ny zava-misy; noraisin-dRajeannot ny vola dia nanoroka ny anabaviny izy. Nisalasala indray anefa ranamana rehefa mby teo am-bavahady; atao ahoana tokoa moa ny hamela ny anabavin’ny tena hoviravirain’ny olona. Ny anadahy fara vady hoy ny Ntaolo izay. Adin-tsaina maro no nifamahofaho tao an-dohan-dRajeannot: ndeha ho aiza, hanao inona, ahoana ny momba an’i Charline,…
Tsy nanalavitra ny tranon’ny anabaviny Ra-Jeannot mba ahafahany manara-maso izay fitrangan-javatra rehetra. Tsy nisy nipika ny vinavinan’i Charline. Indreny tokoa 4x4 roa manaraka ny fiaran’i Fôsy avy taoriana, feno vatan-dehilahy be sandry sady sola loha, “gros bras” hoy ny fiteny mahazatra. Avy hatrany dia niditra ny vavahady sady nampitrerotrerona ny fiarany avy. Nidobodoboka tsy niato ny fitempon’ny fon-dRajeannot nahita izany. Tara iray minitra monja ny nivoahany ny vavahady dia efa tany am-bavan’ny liona izy. Injay tokoa fa velona ny tabataba tao an-trano, nanindrony fony ny kiakian’ny anabaviny niantso vonjeo. Nivoaka teny amin’ny arabe nitazatazana ny manodidina kosa ireo be sandry rehefa tsy nahita an-dRajeannot tao an-trano.