Ra-Jeannot

11/05/2013

Diabe manara-penitra (tohiny) Nisafidy ny tsy hihetsika tamin’ny toerana nisy azy Ra-Jeannot, ndrao tazan’ireo “gros bras” ireto ka hofatifaty fotsiny eo. Miala maina sahala amin’ny mandevina alika tokoa mantsy izay maty na rava fananana mandritra izao Tetezamita izao. Niverina tao an-tsainy tampoka mantsy ny zava-nanjo ny radio Fréquence Plus, izay notafihana andian’olona mirongo basy mahery vaika teo am-perinasa. Hatramin’izao tsy nisy fanadihadiana nisokatra, tsy nisy olona voasambotra kanefa famotehana sy fandrobàna fananana sy fandratràna olona izao. “Ny Fréquence Plus aza niala maina mainka fa ialahy tsy misy mpahafantatra ity! Aleo milamina dia misesy!”, hoy Ra-Jeannot tsemboky ny tahotra.

Mampihoron-koditra tokoa ny toe-draharaha eto amintsika. Fiandrianam-pirenena e! Tany tan-dalana e! Matihanina e! Miaro ny ain’ny olona sy ny fanana e! Raha vitan-dresaka aloha ilay fanovàna nampanantenaina teny an-kianja efa nihoatra lavitra ireo tany mandroso toa an’i Etazonia sy Eoropa i Madagasikara e! Taiza no mbola nisy an’izany fanafigana hainoamanjery am-perinasa izany satria nampivahiny mpanao politika tsy mitovy hevitra amin’ny HAT? Telo taona aty aoriana, tsy misy fanadihadiana kanefa fantatra tsara izao hoe iza avy ireo nanafika sy nandratra olona ary namotika fananan’olona. Kinga ery nefa ny fitondrana HAT manakatona ireo onjampeo ambaran’izy ireo ho tsy manara-dalàna. Rehefa mety amin’ny mpitondra izany ny tsy fanarahan-dalàna sy ny fanitsakitsahana izany dia azo atao tsara?
Raiki-tahotra tanteraka Ra-Jeannot raha nahita zavatra teny am-balahan’iray tamin’ireto “gros bras” ireto. “Mpitandro filaminana mihitsy ve izany no lasa manao “gros bras” sa ahoana?”, hoy izy nanontany tena. Novonjeny nopihana haingana ilay finday nomen’i Charline ndrao tokoa misy miantso tampoka eo ka ho raisim-potsiny. Saika teraka hatramin’ny tsy fiteny mihitsy anefa ny an-dRajeannot rehefa namono ilay finday. Nikarantsana be ny feon’ilay finday foza orana ; voatery nipetrahana tao ambany fitombenany mihitsy mba tsy hisy handre. “Saika silaka aho le! ‘Tony marina tena foza orana! Le foza orana amin’ny ankapobeny mihitsy no tsy misy ilàna azy e!”, hoy Ra-Jeannot nipararetra.