Ra-Jeannot

13/05/2013

Diabe manara-penitra (tohiny) Nanapa-kevitra hampandre mpitandro filaminana Ra-Jeannot, tsy te hibaby nenina mandra-pahafaty nitazam-potsiny ny anabaviny teo anatrehan’ny vono manjo azy. Niditra lalan-kely nanalavitra ny trano fonenan’i Fôsy izy mba tsy ho ren’ireo “gros bras”. Avy hatrany dia niantso tamin’ny ireo laharana maitson’ny mpitandro filaminana izy, nanazava ny zava-misy sy ny toerana. Fahadisoam-panantenana anefa ny an-dRajeannot. Im-polo naneno tsy nisy nandray ilay laharana, avy eo indray valinteny mankarary no azony; tsy manana solika hono ny mpitandro filaminana raha mety dia mba alaina izy ireo. Saika nahateny ratsy mihitsy Ra-Jeannot nandre izany: “afaka naka an’ialahy isany tany ve leity handany crédit hiantso a! Atao inona fotsiny ireny nomerao teninteneninareo isan’andro ireny?”.

Mba hoantrinona marina tokoa moa ny volan-tsolika voasoratra ao anaty Teti-bolam-panjakana ho an’ny mpitandro filaminana e? Im-piry ao anatin’ny indray andro no tena miasa ho amin’ny filaminam-bahoaka ireny fiara 4x4 an’ny mpitandro filaminana ireny? Ndrao dia lanin’ireo deba amin’ny fianakaviany fotsiny kosa àry ny teti-bolan-tsolika ho an’ny mpitandro filaminana? Ry madama tsy maintsy haterina any am-piasanany sy izay halehany rehetra, ny ankizy manana ny fiarany manokana, ny rafozana koa tahaka izany. Toa mivangongo eto an-drenivohitra avokoa ny tombotsoa rehetra, farany teo izao misy tobina zandary tsy manana fiara na trano akory nandritra ny fitsidihana nataon’ny praiminisitra Jean Omer Beriziky tany Atsimo. Iza marina no manana tombotsoa amin’izao tsy fandriampahalemana izao? Iza no matahotra fifidianana?
Resy lahatra Ra-Jeannot fa ndeha hitolo-batana hiatrika izay zava-mitranga. Nanambony saina nandritra ny segondra vitsy izy dia nizotra nihazo ny tranon-dry Fôsy. Tankina tsy nisy nahateny ny iray trano nahita an-dRajeannot nigadona teo am-baravarana. Efa nandao azy ny tahotra ka izay koa angamba ny antony. “Apetrahon’ialahy ny anabaviko ry Fôsy ary miangavy anareo rehetra ireo aho tsy hiditra amin’izao raharahan-tokantranonay izao. Efa avy nampandre ny mpitandro filaminana aho ary ho avy tsy ho ela izy ireo”, hoy izy matotra sy hentitra. Tsy nahita hambara i Fôsy nahita ny fahasahian-dRajeannot niatrika azy. Hany heriny, nirifatra namonjy ny efitranony. Nisafosafo hatoka fotsiny kosa ireo “gros bras” ka ny sasany aza toa namonjy niditra tao anaty fiara. “Hita mihitsy ialahy isany hoe foza orana. Rehefa tena sahy ny olona dia ialahy isany indray no mihemotra”, hoy Ra-Jeannot nihomehy irery.