La Nation, feno herintaona

14/05/2013

Daty mana-tantara ho an’ny Gazety La Nation ny 14 mai. Androany tokoa ny tsingerin-taona voalohany nidiran’ny gazety a Nation teo amin’ny sehatry ny serasera teto amin’ny firenena. Raha ny isan’ny taona no resahana, indrindra raha oharina amin’ny fiainan’ny zanak’olombeloha, dia tsy hay ny tsy hiaiky fa mbola kely dia kely izay heritaona izay. Raha ny toerana efa misy azy eo amin’ny tontolon’ny serasera eto amintsika, amin’izao fotoana izao kosa no ambara, dia tsy isalasalana ny milaza fa efa tratra ny dingan’ny fahamatorana.

Porofon’izany ireto tati-baovao izay tsy mivaona amin’ny foto-kevi-dehibe ijoroany. Tsy inona izay foto-kevitra izay fa ny fampiroboroboana ny fandàlana ny rariny sy ny hitsiny eo amin’ny seham-piaraha-monina misy antsika. Antony mahasarika ireo mpamaky azy ka nahafahana nampiakatra hatrany ny isan’ny gazety atonta isan’andro izay efa tafakatra hatramin’ny 5000 isan’andro, amin’izao fotoana izao. Mbola porofon’ny dingana vita ihany koa ny famaliana ny hetahetan’ireo tsy afa-mahazo ireo takelaka voatonta, tamin’ny alalan’ny fanokafana ny Lanation.mg izay efa azon’ny rehetra tsidihina amin’ny tranokalam-pifandraisana isan’andro , hatramin’ny volana oktobra 2012 no mankaty. Tsetsatsetsa tsy aritra no hilazana fa mahatratra 12 000, amin’izao fotoana izao, ireo mpitsidika izany Lanation.mg izany izay mazava loatra fa avy amin’ny faritra rehetra maneran-tany.
Lohahevitra maro no efa nentin’ny gazety La Nation nandritra izay herintaona izay. Saingy tsy azo hadinoina fa isan’ny tena nimasoany tanteraka ny fampanjakana ny mangarahara sy ny fahafaha-maneho hevitra. Tsy mahagaga arak’izany raha sakaizan’ny tia fahalalahana ity gazety ity. Iza tokoa no tsy nangataka ny fiaraha-miasa taminy, raha mbola olom-pirenena Malagasy mandala ny fahalalahana? Eny fa hatramin’ny vahiny mandala izany soatoavin’ny asa fanaovan-gazety izany dia tsy vitsy no efa nandrindra fiaraha-miasa tamin’ity gazety ity. Antony ilazana fa manana andraikitra goavana eo amin’ny fiaraha-monina ny La Nation.
Mazava loatra fa ainga vao hibanjinana ny ho avy, indrindra manoloana ny andraikitra iantsoroany no fanamby apetraky ny Gazety La Nation ho an’ny sakaizany tsy an-kanavaka. Fanamby izay toy ny efa natrehana ka nahatafita azy amin’izao tsingerin-taona voalohany izao: hatramin’ny fiarana-mamindra ka hatramin’ny fananana hazon-damosina. Satria tsy ny haka tahaka izay efa nisy tany aloha no tanjona fa ny hametraka ny maha izy azy ka ahafahany mitondra ny anjara-birikiny eo amin’ny tanindrazana: La Nation.