Ra-Jeannot

15/05/2013

Diabe manara-penitra (tohiny) Nivatravatra avy tany amin’ny efitranony i Fôsy, niaraka tamin’ny basy poleta. “Ny fatin’ialahy sisa no mivoaka an’ity trano ity. Nahoana aho no tafihan’ialahy ato an-tranoko? Ndrao dia heverin’ialahy fa tsy hitako angaha iny sabatra eny an-tanan’ialahy iny?”, hoy i Fôsy. Zendana fotsiny Ra-Jeannot teo anatrehan’izany fiampangana natao azy izany sady nijery ny tananany roa. Adinon-dRajeannot fa mpanao politika ity mifanandrina aminy ity. Izay mantsy no maha samy hafa ny mpanao politika gasy amin’ny any ivelany, mpandainga ary tsy menatra hanameloka olona amin’ny zavatra tsy nataony. Soa ihany fa teo i Charline, vavolombelona azo antoka fa tsy hamono ny anadahiny. Tsy hampaninona iretsy “gros bras” tokoa mantsy ny hijoro eo anatrehan’ny mpitandro filaminana sy ny Fitsarana fa nikasa hamono an’i Fôsy tamin’ny sabatra Ra-Jeannot. Tsy misaina afatsy vola, izay no azo hamaritana ireny be sandry ireny ka na hamotika ho avin’olona aza tsy mampaninona azy ireo.

“Tifiro raha sahy! Tenisany mantsy izao no eo amin’ny fitondrana ka azonareo atao daholo izay tianareo rehetra. Tifiro haingana r’ty fa inona no andrasan-tena a!”, hoy i Charline, nivazavaza am-badiny. “Taperiko eo koa ny ain’ilay alika vavy ‘ty!”, hoy i Fôsy sady natohony teo amin’ny loham-badiny ny lohan’ilay basy poleta. “Leo an-tenisany mianakavy mahantra velona ireto koa aho. Maharikoriko ahy na ny mijery an-tena!”, hoy hatrany i Fôsy. Niditra an-tsehatra tampoka kosa anefa Ra-Jeannot; tsy basy no nandrahonany ity zaodahiny fa ny raharaha mahakasika azy. “Tifiro leity raha mafy be ialahy a! Efa any amin’ny pôlisy daholo ny dossier momba ireo bois de rose naondran’ialahy raha tian’ialahy ho fantatra”. Don-tandroka fotsiny ihany ny an-dRajeannot kanefa nahomby ny tetika. Hatsatra tampoka teo i Fôsy nandre ny tenin’ny valilahiny; nikoropaka nanidy ny varavaram-be sy ny varavaran-kelin’ny salona izy, avy eo namonjy nipetraka haingana.
“Azafady ry izy miandahy fa tafahoatra ny zavatra nataoko a! Azafady leisy ry valy, mifona sy milela-paladiha amin’ialahy mihitsy aho a! Aleo samy mampitony ny fony aloha isika rehetra e!”, hoy i Fôsy, ketraka tanteraka. Nampidina ranom-boankazo tamin’ny verany Ra-Jeannot sady nibanjina an’i Fôsy toa ireny hanaikitra ireny. Izy tampoka indray no “maître” e! Nangiana tahaka ireny nivoaham-paty ireny ny efitrano iray manontolo; ny feon-dalitra manidina aza re. Samy tsy nisy niloa-bava izy telo; Charline moa nandritra izany nitsapatsapa ny tarehiny nivonto vokatry ny totohondry nahazo azy. Ra-Jeannot no namaky ny fahanginana, namerina ny fandrahonana nataony tamin’ny zaodahiny: “izao fotsiny no teneniko amin’ialahy ry Fôsy. Fantatro daholo ny momba an’ialahy rehetra ary efa nomeko ilay deba namako izay ny copie-n’ireo dossier rehetra. Mbola azo ajanona anefa izany…”. Tsy tapitra akory ny tenin-dRajeannot dia indro nitalaho taminy i Fôsy: “inona àry no tian’ialahy leisy ry Jeannot a! Zaodahin’ialahy ange aho e! Aleo leisy halamina raha mbola azo atao ry Jeannot a!”, hoy izy. Izao àry e…!