Ra-Jeannot

16/05/2013

Diabe manara-penitra (tohiny) Mandalo sy miserana fotsiny ihany ny hery sy fahefana azo sy nampiasaina tamin’ny tsy rariny, misy farany daholo tokoa ny zava-drehetra. Iza tamin’ny Malagasy niaina tany amin’ny taona 60 no hino fa ho rava ao anatin’ny fotoana vitsy izany FRS izany. Iza no tsy nihorohoro tamin’ny FRS, nanana fitaovam-piadiana ary fomba tamin’izany andro toa ny basy Uzi izay mbola ampiasana hatramin’izao taona 2013 izao? Iza no tsy raiki-tahotra tamin’izany TTS izany tany amin’ny taona 80, herim-pamoretan’ny mpitondra sosialista notarihan’ny kamarady Didier Ratsiraka? Tao anatin’ny indray mipi-maso dia ringana ireo be sandry sy jiolahimboton’ny mpitondra.

Tsy nisy sahy nitonona ho TTS na iray aza ireo mpikambana afaka nandositra. Tonga indray koa ny RESEP, nalaza tamin’ny fanaovana bontolo fotsiny izao satria mpiambina ny filohan’ny repoblika. Nanjary fady ho an’ireo miaramila mihitsy ny mitonona ho RESEP rehefa vaky ny hetsi-bahoaka. Dia mbola nodimbiasan’ny GP koa izany tranga izany nandritra ny fitondrana Ravalomanana Marc.
Noheverina ho tapitra nandritra iny fitondrana jadon-dRavalomanana Marc iny ny fampiasan-kery satria efa nisafidy ny fanovàna ny vahoaka nandritra ny hetsika teny amin’ny kianjan’ny 13 may ny taona 2009. Loza! Tsy mbola nisy fampiasan-kery nihoatra ity fitondrana jadon-dRajoelina ity hatramin’izay 52 taona nahazoana ny Fahaleovantena izay. DST, EMMO, FIS, sns. Tsy nahamenatra ity fitondrana jadona ity ny naneho fiaraha-miasa ampahibemaso tamin’ny gros bras, nandrava ny hetsi-bahoaka nitaky ny rariny sy ny hitsiny. Voasambotra sy miditra am-ponja avokoa izay mihetsika manohitra izao fitondrana kitoatoa izao. Basy sy lakrimôzena no valim-babena azon’ny vahoaka tamin’ny mpitondra, manjakazaka izay tsy izy ny Foloalindahy. Iza anefa no tsy mahafantatra fa fahavalon’ny fampandrosoana ny Tafika eto amintsika. Tsy misy ataon’ny miaramila ankoatra ny mandray karama isam-bolana, manao basket sy volley ary footing vao maraina ange eto e! Dia mipetraka ny fanontaniana: aiza no hanitrihan’izy ireo ny lohany amin’ny fotoana iray?
“Izao le izy ry valy e! Ampy izay fiheveranareo ny tenanareo ho mafy be sy tompon’ny fahefana izay. Tsy misy hanaiky ataonareo ho mpiasakelinareo na mpanomponareo intsony eto. Mandihy eo ambonin’ny fahavoazan’ny olona ange ny olona toa anareo ao anatin’io fitondrana foza orana io e! Noho ianareo no tsy naha an’asa anay, noho ianareo no nahatonga anay ho very hasina teo anatrehan’ny fiaraha-monina, noho ianareo no naha 4’mi anay. Nanan-karena tampoka noho ny fahavoazan’ny hafa ianareo sady tsy mahay miaina fa misetrasetra etsy sy eroa. Ka fifanarahana sy fandaminana tahaka ny ahoana moa ity tadiavin’ny valy hatao ity? Rehefa ianareo izany no manao dia tokony hangiana ny olona; rehefa anjaranareo kosa no mizaka izay nataonareo dia hoe ndao hifandamina?”, hoy Ra-Jeannot, tsy nitsitsy fitenenana namoaka izay rehetra tao am-pony.