Ra-Jeannot

21/05/2013

Diabe manara-penitra (tohiny) Fantatry Ra-Jeannot tsara fa mboa afaka miady ambony noho io sora-bola io tenany. Natahotra koa nefa ny tenany ndrao hivadika biby tampoka i Fôsy ka hitsipaka ny teny nomeny. Fomba amam-panaon’ny mpitondra eny hatramin’ny filohan’ny HAT rahateo ity tsy mitàna ny teny nomeny ity ka dia naleony nekena tamin’ny fomba mihaja sady naka toky mba tsy hisian’ny arakaraka: “inona moa ry valy no hoteneniko eo fa dia izay izany. Sao mantsy holazaina indray fa nangalatra ny volanareo tato aho; izay mihitsy izao no mampieritreritra ahy hoe handray sa tsia izany vola izany”. Maika mihoatra ny boka hanam-bady anefa i Fôsy ka nilokaloka fa tsy hanao fihetsika hafahafa aorian’izao raharaham-pihavanana izao.

Nandritra ity fitondrana HAT ity no nahitana fivezivezena ravim-bola be indrindra hatramin’izay nisian’ny krizy teto amin’ny firenena izay. Tsy maintsy hanota vola vaovao ihany izay mpitondra amin’ny Repoblika faha-IV. Be loatra ny vola miafina any ambadika any izay mety hanohintohina ny fandriampahalemana any aoriana. Nanao izany ny fitondrana Ravalomanana rehefa tonga teo amin’ny fitondrana, nikasa hanota vola vaovao koa anefa ny HAT saingy… Manodidina izay resa-bola izay rehefa dinihana ny fototry ny krizy nifandimby. Resaka tombotsoa manokana avokoa no nentina namitaham-bahoaka teto fa tsy misy izany fitiavan-tanindrazana izany. Fa fantatra ihany ange izany Andry Rajoelina izany, talohan’ny filohan’ny HAT azy, izao ka milaza ho tompon’ny vola isaka izay mikabary amin’ny hoe “volako manokana”. Fa taiza no nanany izany vola be izany ary tamin’ny fomba ahoana?
Ny Malagasy moa toa lasa bado sy mora hambakaina, indrindra ireto ambany tanàna ireto, na dia tsy tian’ny sasany aza ny hitenenana izany. Hampireven’ny olona fampisehoana tsy andoavam-bola eny Antsonjombe dia faly sy ravo, kanefa mandry fotsy rehefa tonga any an-trano. Ny sasany aza mahavita miteny amin’ny fahitalavitra mihitsy fa ity fitondrana HAT ity no mba nitsinjo azy ireo hatramin’izay. Dia sanatria maneso azy ireo ve rahatoa ka mikakakaka eo anatrehan’izany? Ha!Ha!Ha!Ha! Tohano tsara àry ny fitondrana mitsinjo anareo e ry ambany tanàna a! Ny zanak’olona angaha no tsy mianatra, ny zanak’olona angaha no tsy misakafo, ny zanak’olona angaha no tsy voatsabo rehefa marary, ny zanak’olona angaha no mangovitry ny hatsiaka?