Ra-Jeannot

24/05/2013

Diabe manara-penitra (tohiny alohan’ny farany) Voaresaka matetika isaka izay misy fandraisam-pitenenana tato ho ato ny hoe foto-pisainana tena Malagasy, ny maha Malagasy, ny soatoavina Malagasy, sns. Dia mipetraka mihitsy ny fanontaniana manao hoe: tena tsara saina marina tokoa ve isika Malagasy? Tena mendrika tokoa ve izany foto-pisainana Malagasy izany? Firenena iza ary vahoaka aiza no manana fomba fisainana mitovy amintsika Malagasy? Isika Malagasy irery ihany angamba no olombelona eto ambonin’ity tany ity, manana izao fomba fitenenana izao: raha maty aho matesa rahavako! Dia izao zava-manjo ny Malagasy nandritra izay efatra taona nitondran’ny filohan’ny HAT ny firenena izao.

Tsy vitan’ny hoe tia tena fa ory hava-manana ihany koa ary ny tena mampalahelo dia ny samy sahirana ihany no mifamely sy mifamango. Iza moa no manao ireny hala-botry ireny tsy ireo sahirana eo amin’ny manodidina ihany? Ilay mangahazo na voamanga kely nisasaran’ny hafa no indro misy mangalatra. Tsy ny lakozian’ireo mpanefoefo velively no misy mamaky, fa ny an’ireo vahoaka sahirana.
Niteraka fialonana ho an’ny sasany ny fiverenan-dRajeannot ho isan’ny mpiara-monina, tonga ho olombelona indray. Tsy iza fa ireo mpiara-misotro kônsôma taminy fahiny ihany. Resa-be tao amin’ny bar Tsimialonjafy nandritra ny tontolo andro Ra-Jeannot. Samy namorona izao resaka tonga tao am-bavany rehetra izao ry zalahy, nahagaga mihitsy aza fa dia lasa fahavalon’ireo tampoka teo. Ra-jeannot koa moa tahaka ny andevolahy nahita fotsim-bary araka ny fitenenana. Indraindray aza haingo diso an’Iarivo no eny an-kodiny. Midanika andro be iny avy dia mbola mahita izay manao “blouson cuir” mainty be, te hatao hoe manam-bola. Mafy tokoa aloha ilay vao avy natory teny an-dalambe sy nihidy violon e! Ny madinika indray tompoko dia tsy hitazam-potsiny eo anatrehan’izany. Tsy ny fahantrany akory no olana aminy fa ianao tafasondrotra no mampalailay azy. Voninahitra ho azy ny miambina sy miaro ny harem-ben’ireo tremalahy ary tena sarotiny amin’izany, kanefa mandroba ireo vao mivelona sy madinika mitovy aminy. Izay ilay antsoina hoe vahoaka madinika.
Sambany nandritra ny volana maro Ra-Jeannot no mba natory niaraka tamin’ny kibo voky. Torimason’adala tsy mahare izay ambonin’ny tany. Noheveriny angamba fa miara-paly aminy amin’izao “fandresena” azony izao ny taranaky Eva. Noheveriny ihany koa fa mira-mandry aminy ny voahary manontolo. Indrisy, diso hevitra tahaka ny mpivarotena nitoe-jaza tsy fidiny Ra-Jeannot. Miandry azy ho tafakatra any amin’ny lanitra faha-fito fotsiny ry vahoaka madinika dia ho avy haka ny anjarany araka ny fomba mahazatra azy ireo. Amin’ny 11 ora alina izay!