Ra-Jeannot

27/05/2013

Diabe manara-penitra (tapitra) Tsy mbola nisy tsy fandriampahalemana mihatra aman’aina tahaka izay efatra taona nitondran-dRajoelina sy ny forongony izay teto Madagasikara. Mitafy rà sy ranomason’olona loatra ity fitondrana foza orana ity. Voalaza ombieny fa matihanina ireo mpitandro filaminana ary miaro ny ain’ny olona sy ny fananany. An-jatony anefa ny aina nafoy noho asa ratsin’ireo dahalo sy mpanao fanafihana mitam-piadiana nanerana ny Nosy ary ny tena loza dia jeneraly roa be izao anefa no matin’ny jiolahy tato anatin’ny fotoana fohy.

Tsy mba menatra eo anatrehan’izany trangan-javatra rehetra izany ve ireto manamboninahitra ambony eto amintsika ireto? Ny olona tsy manana basy ihany no mba sahin’izy ireo rahonana sy hampihorohoroana lava izao; vaky mandositra kosa rehefa sendra ireo jiolahy manana fitaovam-piadiana sahy mifanandrina aminy. Tsy misy andro tsy handrenesana fanafihana mitam-piadiana na an-drenivohitra izany na ambanivohitra. Izao anefa no mahavariana; ny mpitandro filaminana sy ny Foloalindahy no sehatra nahazo fanampiana sy nandanian’ny HAT vola be indrindra raha samy mpiasam-panjakana. Vao mihetsika na dia ny volomason’izy ireo fotsiny ihany aza dia indro mandadilady ny mpitondra.
Ny samy madinika ihany no mifampitsetsitra sy mifamono. Izay mihitsy araka ny efa nambara tany aloha no antsoina hoe madinika: mpiambina mahafatra-po ny haremben’ny mpanefoefo kanefa mpandroba ny kely am-pelatanan’izay mitovy aminy. Fahafinaretana ho an’ny madinika ny mitanisa ny 4x4 sy ny tranobe vao avy novidian’ny mpanana; fialonana ho azy kosa ny mahita mitovy saranga aminy, nahazo kiraro na pataloha iray vaovao. Tsy maintsy mahita hevitra hanimbana na hangalarana iny patalaloha na kiraro iny izy na ho tonga hatramin’ny fanalàna ny ain’ny tompony aza. Raha tsorina ny resaka dia ny madinika ihany no mampanjaka ny mpanana sy mampitrongy vao homana ny malahelo. Voaporofo izany nandritra iny 26 janaory 2009 iny. Tsy voakasika mihitsy ireo tranombarotra karana mpangoron-karena. Niharihary loatra tamin’izany ny zava-nisy tetsy Behoririka. Voaroba tanteraka ny CITIC sy ny Suprême Center; tsy voakitika mihitsy anefa ny Luxor (cinéma Soa teo aloha). Kisendrasendra daholo ve izany?
“Aiza ny vola?”. Feo mitrerona teo am-poto-tsofiny no nanaitra an-dRajeannot tamin’ny torimasony. Akory ny hatairany nahita telolahy be miaraka amin’ny “barre à mine” sy sabatra ary antsy be manodidina azy. Nokosehiny ny masony roa, noheveriny ho manonofy izy kinanjo tena izy. “Aiza ny vola ry leiry f’aza mody adala eo aialahy a!”, nandeha ihany moa ny daroka sy ny teny ratsy isan-karazany. Avy hatrany dia nodakan’ny iray tamin’izy telolahy teo amin’ny kibony Ra-Jeannot ka nianjera taminy tany. Novelesin’ilay faharoa tamin’ny “barre à mine” indray koa ny tongony; ilay fahatelo moa manohy manontany azy izay misy ny vola. Namoaka “scotch” avy tany am-paosiny ilay nitàna sabatra, nobatainy ho eo ambony fandriana Ra-Jeannot, efa tsy dia mahatsiaro tena loatra intsony vokatry ny vono nahazo azy. Notampenan’izy ireo tamin’ilay “scotch” ny vavany; manaraka ihany koa anefa ny totohondry sy felaka tehamaina. Tsy dia misy entana firy moa ao an-tranon-dRajeannot ka tsy sarotra tamin’ireto jiolahy ireto ny nitady izay toerana misy ny vola.
Very asa tsy fidiny noho ny hetraketrak’ireo mitonona hitondrana fanovàna Ra-Jeannot. Nahiliky ny fiaraha-monina nony resy ary lasa fahavalon’ireo izay noheveriny ho iray ady sy iray tolona aminy kosa rehefa nitraka.