Tratra farany!

28/05/2013

Tsy hiala hono i Tabera! Iza no miraharaha an’izany e! Olona notampohan’ny nahazo seza sy fahefana, mba mitaingina 4x4 tsara tarehy, manana saofera sy “garde de corps” toa an-dry Tabera ve hiala izany na hosokirina amin’ny angady aza e! Ny toa azy ireny mihitsy no tsy azo homena fahefana, midongy an-kanina sahala amin’ny zazakely. Mba mihevitra ny hahazo vato firy amin’izany fifidianana filoham-pirenena izany moa i Tabera e? Tsy naleony ve aloha fifidianana filoham-pokontany no handramana vao mibitabitaka amin’izany filoham-pirenena izany. Sitrany nanamboarana villa ilay 250 tapitrisa natao antoka e! Tsy ho lany eo akory ange e! Tsy haverim-bola mihitsy aza.

Tsy hiala koa hono i Dolin! Ka ho isan’ireo handroaka “aotra faingo” amin’ny fifidianana filoham-pirenena koa ange ny tenany koa maninona tokoa raha mba havela hinono volam-bahoaka sy higalabona faramparany amin’ny fananam-panjakana ao aloha e! Tsy hisy ho lany amin’ny fifidianana filoham-pirenena avokoa ange ireto midongy an-kanina ireto e! Notendrena sy nanendry tena daholo fa raha safidim-bahoaka no antenaina hahazoana toerana, tahaka ny manisy sira valala eny an-danitra. Sady efa ho tonga eto Antananarivo tsy ho ela koa ange ny valala e! Izay vao tena tanteraka ilay fanovàna; tsy mila mividy laoka intsony ny Malagasy. Mitono valala dia voky.
Tsy hiala mihitsy hono Rajoelina e! Dia maninona? Mbola eo i Annick Rajaona sy Naivo Raholdina hanohana azy hatramin’izany farany! Efa ny fanahy masina izao ve no niteny taminy, araka ny nambarany, ka inona indray no mahataitra antsika amin’izany! Ny fanahy masina ange izany no niteny tamin’ny filohan’ny HAT hoe “aza miala iana anaka!”. Zavatra nisasarany sy nanaovany sorona ny vahoaka Malagasy kosa ve hilaozana mora foana e! Mamy ange izany antsoin’ny olona hoe “filoha” izany e! Tsy mila mifoha maraina na miainga aloha any an-trano, eo ireo bemôtô mpisava lalana hanome toky. Mbola hanao 26 jona miaraka amin-dry jeneraly Rakotoarimasy Lucien sy Rabarisoa Ranto, etsy an-danin’izany.
Saingy izao, tandremo ndrao dia amin’ny fotoana te hiala vao hofikirin’ny seza tsy avelany mitsangana eo intsony! Ianareo aloha izao no tsy mahafoy azy fa mbola ho avy kosa ny ora tsy hafoizany anareo. Izay ilay antsoin’ny olona hoe “tratra farany”. Hanaiky ho tratra farany miaraka aminareo eo mantsy ireo “garde de corps” ireo.