Mbola misy ?

29/05/2013

Mbola misy miaramila ihany ve eto amintsika sa efa mpitolona manao fanamiana sisa ? Mampalahelo sady mahamenatra loatra ny fihetsika asehon’ireto tomponandraikitra ambony eo anivon’ny Foloalindahy ireto. Mivandravandra tokoa ankehitriny fa mpanompon’ny filohan’ny HAT avokoa izy rehetra. Raha tena mpampihatra lalàna marina ny Foloalindahy sy ny mpitandro filaminana, inona no tsy haneren’izy ireo ny filohan’ny FAT mba hametra-pialàna raha tena tsy misy olona ambony noho ny lalàna eto amin’ity firenena ity ? Maninona raha tsorin’ny jeneraly Ranto Rabarisoa sy Lucien Rakotoarimasy fotsiny hoe « mbola te hanao 26 jona miaraka amin-dRajoelina » dia vita ny resaka, tsy hisy hitabataba azy ireo amin’izany intsony. Efa hita izao fa Foloalindahy tsy mahavita ny andraikiny, variana amin’ny politikan-tseza sy tombotsoa. Tsy mba menatra mihitsy ve ireto tomponandraikitra ireto, ny amin’ireo jeneraly sy manamboninahitra matin’ny jiolahy tamin’ny fomba feno habibiana, ny faty olona etsy sy eroa vokatry ny fanafihana mitam-piadiana ?

Apetraka manokana amin’ny jeneraly Lucien Rakotoarimasy ny fanontaniana : « fa nahoana ianao no namono finday sy namela an’Antananarivo hodoran’ny sasany ny faha-26 janoary 2009, mbola lehiben’ny Etamazaoron’ny Tafika ianao tamin’izany fotoana ? Ankehitriny kosa, miady mafy sy mampihorohoro izao rehetra izao mba hijanonan’ny filohan’ny HAT eo amin’ny sezany ! ». Mbola mendrika ny antsoina hoe miaramila ve ity jeneraly notendren’ny mpanongam-panjakana ho ministry ny Foloalindahy ity? Mbola mendrika ny antsoina hoe Foloalindahy ve ny Tafika Malagasy ? Ndrao dia efa milisy kosa e!
Mitonona ho tsy manao politika ary tsy momba amin’ny atsy na eroa kanefa miditra an-tsehatra mihitsy, mitady izay paika politika miharo fampihorohoroana, hitazonana ny filohan’ny HAT eto amin’ny fitondrana. Mpanompon’olon-tokana ve sisa no nihafaran’ny Tafika Malagasy? Firy andro izay no nanambaran’ny amiraly Didier Ratsiraka, ny zava-doza nataon’ireo tomponandraikitra ambony eo anivon’ny Foloalindahy, tamin’ny praiminisitra Eugène Mangalaza, ka nahatonga ity farany nametra-pialàna; tsy nisy na dia iray aza sahy nandiso izany. Midika izany fa tena norahonana tamin’ny basy tokoa ity praiminisitra ity satria izay no sitrapon’ny filohan’ny HAT. Inona no maha samy hafa ny Foloalindahy amin’ny terorista ary izay indrindra no hametrahana fanontaniana eto hoe: mbola misy miaramila ve ao anivon’ny Tafika ao e?