Ry Mpanjaka ô !

30/05/2013

Velon-taraina ry Ambohitsorohitra fa tsy tonga niankohoka teo amin’ny filohan’ny HAT, ny praiminisitra Jean Omer Beriziky. Bla !bla !bla ! tsy nisy toa izany ny fanambarana nataon’ny sampan-draharaha misahana ny serasera eo anivon’ny fiadidiana ny prezidansa momba izany tsy fahatongavan’ny PM nanatrika ny filan-kevitry ny minisitra. Nanapa-tsinay mihitsy ny namaky ilay fanambarana, mitanisa izao fandrebirebena isam-bahoaka rehetra izao. Fa angaha heverin-dRajoelina ho mpanompony tahaka ny jeneraly Lucien Rakotoarimasy, Ranto Rabarisoa ary Ndriarijaona André avokoa ny olon-drehetra e ? Ireny no mivavaka aminy, toraka izany koa ny ministry ny Atitany izay namolavola lalàna hijanonan’ny filohan’ny HAT eo amin’ny fitondrana ary ny ministry ny Serasera mpitàna ny lakilen’ny jadona.

Mahita izao bla !bla !bla ! hifikirana eo amin’ny seza izao hatrany ity filohan’ny HAT ity sy ny forongony nandritra izay efatra taona izay. Inona no nisakana an-dRajoelina tsy nandefa miaramila mirongo basy nanery ny PM hiankohoka taminy, tahaka ny fomba amam-panaony e ? Ny TGV izay mba niezaka nitady vahaolana manoloana izao tsy fahombiazan’ny antoko izao aza nivelesan-dRajoelina latabatra. Azy hono ny TGV ka izay tsy faly mahazo miala! Tian’ny filohan’ny HAT hiankohoka aminy avokoa ny olon-drehetra, ka na ny Fianakaviambe iraisam-pirenena aza nanirahany ireny jiolahimboto nilanja sora-baventy, niteny reatsy sy nanompa an-dRtoa Fatima Samoura ireny, rehefa tsy nanaiky izany.
Ireo tompomenakely ao Ambohitsorohitra ao ihany no miankohoka aminao ry Mpanjaka ô! Ireo no savolaina sy malahelo anao raha miala eo amin’ny fitondrana fa tsy ny olom-pirenena rehetra akory. Tsy misy intsony araka ny voalazan’ilay fanambarana ny fiaraha-mitantana (???). Im-piry moa ny filohan’ny HAT no nandray fanapahan-kevitra mahakasika mivantana ny fiainam-pirenena no naka hevitra sy niara-nidinika tamin’ny praiminisitra, raha tsy hiresaka fotsiny afatsy ny “opération Tandroka” tany Atsimo? Sendra ny olona mahay azy tsara ity filoha nanongam-panjakana ity ka nibitabitaka nandefa bla!bla!bla! tamin’ny alalan’ny sampan-draharahan’ny seraserany. Ho tsara antitra anie ianao ry Mpanjaka ô!