Tendreo ao e !

31/05/2013

Misy manam-pikasana hanala an’i Jean Omer Beriziky tsy ho praiministry ny fitondrana Tetezamita intsony hono any ambadika any e! Izany jeneraly fanta-daza izany angaha hoe no tadiaviana hasolo azy?? Tsy miady amin’ny piesin’ny sasany mihitsy mantsy hono ity lehiben’i Mahazoarivo ity. Izay tonga teo amin’io toerana io tokoa aloha, ka tsy nanaiky niankohoka tamin’ny filohan’ny HAT, dia tsy nijanona ela sady voasembantsembana lava e!

Mitady haka fanjakana koa angaha hono ity praiminisitra ity sa ahoana? Izay rehetra miteny na mitsikera na koa tsy manaiky ho embany vahohon’ny mpitondra HAT mantsy dia ampangaina ho mikotrika fanonganam-panjakana avokoa. Izy ireo anefa no tena nanongam-panjakana, porofon’izany ny tsy faneken’ny SADC sy ny Fianakaviambe iraisam-pirenena, indrindra ny vondrona Afrikana, ny filatsahan-kofidian’ny filohan’ny HAT, Andry Rajoelina. Mora tokoa ny manome tsiny sy manameloka ny hafa, tsy mahita ny volobe eo an-tampon-kandriny! Ny handrina no tsy naniry volo, hoy ny Ntaolo, noho ny henatra. Mety vohambolana vaovao na tsy misy akory ho azy ireo anefa izany teny hoe “henatra” izany.
Ny sasany indray moa vao nahazo 4x4. Ela no naniriany izany, nanaovana izao fampitahorana rehetra izao fa hanao ampamoaka, sns. Manina ny andro fahiny tokoa angaha ka dia hiverina hanao madaraid indray ary mety hanaiky mihitsy aza ny fanesorana ny praiminisitra Omer Beriziky satria tsy mba nanome 4x4 ho azy. Dia ho raikitra indray izany ny fanendrena praiminisitra sy minisitra raha izao no mitohy. Velona indray ny ady seza sy ny fingampingana isan-karazany. Loharano tsy mety ritra mihitsy tokoa aloha ireny ministera ireny e! Firy akory izay voalaza fa nanodinkodim-bola fa toa rano natondraka an-damosin-gisa.
Tendreo ao izay tendrenareo e! Ny vahoaka moa efa tendren’ny fahantrana sy ny tsy fisiana vao miposaka io masoandron’Andriamanitra io. Tandremo fotsiny kosa ndrao hotendren’ny vahoaka tahaka ny mitendry kabaosy amin’ny ora tsy ampoizina vao hitsinjatsinjaka tsy satry e!