Valalabemandry !

03/06/2013

Nahita hevitra hanemorana ny datim-pifidianana indray ny filohan’ny HAT, Andry Rajoelina. Mbola hamono valala indray mantsy hono ny tenany ka tsy afaka hisaina izany fifidianana izany. Lasa “cas de force majeure” indray mantsy izao ny valala ka tsy maintsy hovonoina haingana.

Izao anefa ny olana : ho faty miaraka amin’izany famonoam-balala, paika politika hanemorana ny fifidianana izany ny valalabemandry, valala voatango rahateo nandritra izay efatra taona nitondran’ny HAT ny firenena tany an-kady azy izay. Ny fahatongavan’ny valala eto an-drenivohitra no hany sisa fanantenan’ireo tsy mahita hohanina sy very asa noho ny raharaha 26 janoary. Antananarivo ihany koa ve izany no antsoin’ny mpitondra hoe Madagasikara sa ahoana ? Fokontany, firaisana, Faritra ary Faritany maro ange no nolalovan’ireo andiam-balala ireo; tsy nahataitra ny filohan’ny HAT mihitsy izany satria tsy mbola akaiky azy. Im-piry nanaitra ny sain’ny mpitondra fanjakana ireo fikambanana iraisam-pirenena saingy toa rano natondraka an-damosin-gisa.
Nanolo-tena ary namaky bantsilana ity olana mikasika ny firongatry ny andiam-balala ity ny kandidà Fleury Rakotomalala, nandritra ny hetsika nokarakarain’ny FIVMPAMA teny Ankorondrano, ka nilazany tamin’ny fomba mivantana teo anatrehan’ny praiminisitra lefitra Botozaza Pierrot hoe : « manatona ahy ianareo (mpitondra) raha tsy mahita hevitra hiadiana amin’izao firongatry ny valala izao ». Ny olona tsy eo amin’ny fahefana indray no mivaky loha amin’ny loza mitatao amin’ny firenena sy mandroso vahaolana amin’izany ; ny didy hitsivolana hijanona eo amin’ny sezany kosa no maha maika ny filohan’ny HAT ary ireo minisitra sasan-tsasany mpanompo azy.
Ndrao tokony hanitsy ny diany mihitsy ity filohan’ny HAT ity na mametra-pialàna tsotra izao fa tsy mahavita azy e ! Ny valalabemandry efa no fatin’ny fahantrana sy ny tsy fandriampahalemana, mbola ny hanalava ny Tetezamita tsy hisian’ny fifidianana amin’ny ady amin’ny valala indray no himatimatesany ! Ho tonga ny fanovàna e !