Aleo amin’ny 2018 !

07/06/2013

Inona no ho vita ao anatin’ny iray volana ary aiza no ahitana vola hanatanterahana ny fifidianana tsy misy fanampiana avy amin’ny Fianakaviambe iraisam-pirenena? Rehefa nahemotra ihany io datim-pifidianana io, tsy aleo ve amin’ny taona 2018 mihitsy vao hatao e! Tsy azo antenaina intsony aloha izany fifidianana filoham-pirenena amin’ity taona 2013 ity izany. Kobaka am-bava sy fampandriana hadrisa fotsiny io fanemorana iray volana io. Holalaovin’ny fitondrana HAT indray ny vondrona Zafy Albert izay mitaky ny hanaovana ny fifidianana lalam-panorenana mba hijanonan’izy ireo ela araka izay azo atao.

Tsy niteniteny foana ny ministry ny Raharaham-bahiny Frantsay, Laurent Fabius, nanonona io datin’ny 2018 io. Efa izay no masaka ao an-dohan’ny Lafrantsa, izay rahateo koa ny kajikajy rehetra mahakasika ny ho avin’i Madagasikara. Manam-potoana tsara hametrahany ny paikady politika hiatrehany izany fifidianana izany ny filoha Rajoelina sy ny forongony. Ireto kandidà sasany ireto koa no tena mahavariana amin’izao raharaha izao. Vao tamin’iny filatsahan-kofidian’ny filohan’ny HAT, taorian’ny fe-potoana voalazan’ny lalàna iny dia efa tokony niray hina tsy nankasitraka izany izy ireo. Mazava araka izany fa tsy misy kandidà mahaleotena izy ireo fa iraka fotsiny ihany, hanaparitaka vato.
Koa mba tsy hifamitam-pitahana lava eto aleo amin’ny 2018 mihitsy vao misaina izany fifidianana izany. Ndao ary aloha hamono valala hanomezana vahana ny foza orana. Asakasak’izay efa nandany vola nanao propagandy mialohan’ny fotoana aloha e! Tsy hisy fifidianana izany eto, ny hijanona eo amin’ny fitondrana am-polo taona tsy misy fifidianana tahaka an’i Gbagbo no metimety amin’ny filohan’ny HAT. Ny Tafika rahateo manompo ny jeneraly Lucien Rakotoarimasy sy Ranto Rabarisoa avokoa. Izany hoe, mbola hitohy sy fampihorohoroana ireo izay mitady vahaolana hivoahana haingana amin’izao krizy izao. Aleo amin’ny 2018 e!