Olala !

08/06/2013

Mpampianatra no filohan’ny Repoblika voalohany teto Madagasikara, dia Itkly Philibert Tsiranana. Toa niaina ihany ny vahoaka Malagasy tamin’izany andro izany, mbola nanana ny toerany izany mpiasam-panjakana izany, avo lenta ny fampianarana, nisakafo ny maro tamin’ny vahoaka, nanjaka ny fanajàna ny lalàna sy ny fandriampahalemana, nadio ny tanàna, nibaliaka ny ho avin’ny tanora, sns. Narodan’ny vahoaka ihany anefa izany fitondrana izany satria tsy nahafa-po azy, nitady ny tsaratsara kokoa.

Tonga ny Repoblika faharoa, notarihan’ny capitaine de frégate Didier Ignace Ratsiraka. Nitontongana andro aman’alina ny fari-piainan’ny vahoaka, nahazo vahana ny fanaovana politika sy ny fampidirana ny resaka politika tany anivon’ny mpiasam-panjakana tsy an-kanavaka, indrindra ny Foloalindahy : SEREMA, VAREMA, MAREMA... Nanjaka ny sivana sy ny jadona, fahantrana no andavan’androm-piainan’ny Malagasy, nilaharana avokoa ny zava-drehetra toa ny vary, ny sira, ny menaka, ny savony, nanomboka nahazo vahana ny tsy fandriampahalemana sy ny ramatahora noho ny nafitsoky ny TTS, sns. Narodan’ny vahoaka indray koa ny revolisiona sosialista, tonga ny Repoblika faha-telo. Profesora Zafy Albert no nametrahan’ny vahoaka ny fitokisana hanarina ny fiainany. Tafapetraka teto Madagasikara tokoa ny fahalalahana sy ny demôkrasia, nisokatra avokoa ny hainoamanjery tsy miankina, nalalaka ny fanehoan-kevitra saingy tsy tafavoaka mihitsy ny lafiny ara-toekarena. Vokany, tsy nisy akony tamin’ny fiainana andavan’andron’ny Malagasy ny politikam-pitantanan’ny mpitondra. Mbola nanjaka ihany anefa ny resaka politika teny anivon’ny asam-panjakana, noho ny ampihi-mamban’ny antoko UNDD.
Tonga teo amina sampanana vaovao indray ny Malagasy ka nisafidy hiara-dia tamina mpandraharaha. Minoa fotsiny ihany, 4L iray isam-baravarana, sahy manao dingana lehibe, miasa miasa mafy miasa tsara, sns. Mbola nanjaka hatrany ny resaka politika teny anivon’ny asam-panjakana : TIM Fanabeazana, TIM Fahasalamana, sns. Niverina ny tsy fandriampahalemana: kidnapping, fanafihana mitam-piadiana. Nataon’ny mpitondra ampihi-mamba avokoa ny sehatry ny fandraharahana, nanomboka tamin’ny zavatra ilain’ny mponina andavan’andro ka hatramin’ny asa vaventy fanamboaran-dalana sy ny asa fanaovan-gazety. Nianjery tsikelikely ireo orinasa madinika sy salantsalany, valala voatango ireo tantsaha ary nihorohoro lava ireo mpandraharaha nifaninana ara-barotra tamin’ny mpitondra. Niroborobo fatratra tao anatin’ny fotoana fohy kosa ny orinasan’ny filoha, nidirany avokoa rehefa mety seha-pamokarana izay nomen’ny fanjakana vahana manokana rahateo. Leon’izany fitondrana Ravalomanana Marc izany indray ny vahoaka dia nisafidy mpandraharaha iray faharoa, dia ny filohan’ny HAT Andry Rajoelina. Vao maika loza ny zava-nanjo azy. Lasa tsy fandriampahalemana, trafika sy kolikoly ary gaboraraka sy ramatahora ilay fanovàna nilokalokana tamin’ny vahoaka fony teny Ambohijatovo. Lasa mpisikidy mampandihy marary ilay DJ volom-boasary teny amin’ny 13 may. Fahantrana, tahotra, aretina, mosary, sns. Izany no iainan’ny vahoaka Malagasy nandritra izay 4 taona nahateo azy izay. Mbola manjaka ny resaka politika eny anivon’ny asam-panjakana: ny TGV izany!
Fehiny, tamin’ny andron’ny Repoblika I no niaina kokoa ny Malagasy raha hoarina tamin’ireto mpitondra miaramila, mpitsabo, mpandraharaha in-droa nisesy ireto. Hiaraha-mahita eto fa mbola hifidy olona mpampandry hadrisa sy mpampiesona indray ny Malagasy amin’ity fifidianana manaraka ity. Olala!