Izay vizana eto e !

10/06/2013

Tetika politika maloto handrerahana ara-bola sy ara-tsaina ireo kandidà mpifaninana amin’ny mpitondra no fandikan’ny mpanara-baovao izao fanemorana ny datim-pifidianana izao. Hatreto tokoa mantsy dia tsy misy afaka ny hitompo teny fantatra fa tena hisy fifidianana filoham-pirenena amin’ny faha-23 aogositra 2013. Azo antoka fa mbola hahita hevitra sy tetikady hafa hanemorana indray ny fifidianana ny mpitondra HAT, toa ny fanaovana fitsapahan-kevi-bahoaka, ny ady amin’ny valala, tsy fisian’ny vola hanomanana ny fifidianana, ny tsy fahatomombanana ara-teknika, sns. Ataon’ny mpitondra HAT mihitsy izay maha kivy ireo mpifaninana. Ny antony?

Tsy misy azo antoka ireo kandidàn’ny mpitondra hiatrika ity hazakazaka masina ity; mahafantatra tsara izany ny filohan’ny HAT. Na ny tenany aza tsy azony antoka intsony manoloana ireto kandidà maro izay samy manana ny fahavononany ireto. Izay no tena olan’ny HAT amin’izao fotoana izao; izay no anton’izao tetika sy paika politika hanemorana lava ny fifidianana izao. Tsy nisalasala na iray minitra aza hiroso tamin’ny fifidianana ary mety nitady hevitra ny hanatanterahana izany tao anatin’ny fotoana fohy mihitsy ny mpitondra raha nanana antoka fa hivoaka mpandresy amin’ny fifidianana filoham-pirenena. Hatao mihitsy araka izany izay hamizanana ara-bola sy ara-tsaina ary ara-moraly ireo mpifaninana, izay ho hany hevitra hitan’izy ireo.
Niova endrika teo no ho eo tokoa mantsy ny tontolon’ny politika taorian’ny fanambarana ny fihemoran’ny datim-pifidianana. Maro tamin’ireo kandidà ny nampiato avy hatrany ny fitsidihana sy ny fanaovan-tsonia fifanarahana mifandraika amin’ny fifidianana. Azo ambara mihitsy fa nampihemotra ireo kandidà tamin’ny fanatanterahana ireo stratejia izay napetrany, hiatrehana ny tena fampielezan-kevitra iny fanemorana farany teo iny. Izay mihitsy anefa no tanjon’ny mpitondra; mitohy hatray anefa ny fitokanana fananam-bahoaka sy ny fizarana vola etsy sy eroa. Izay iray vizana aloha eto e! Tsy vao izao akory no nisy mpitondra nihevi-tena ho matanjaka teto amin’ny tanindrazana iombonana ity.