« Bonbon olona ! »

11/06/2013

Direktoara militera ve zany zao eto amin’ny tanàna sa inona e ? Ahoana koa ity fankalazana ny faha-53 taona nahazoana ny Fahaleovantena tsy misy afatsy miaramila ity ; amin’izay indray jeneraly namela an’Antananarivo hodoran’ny afo sy horobain’ny olona no hitarika azy eny Mahamasina ? « Bonbon olona » daholo ve izany no fiheveran’ny Tafika ireo filohana andrim-panjakana eto amintsika toa ny praiminisitra Omer Beriziky, ny filohan’ny CT Mamy Rakotoarivelo. Niniana tsy noresahana mihitsy ny kandidà Dolin Rasolosoa. Tsy tokony ho filohan’ny CST intsony mantsy ny tenany amin’ny maha kandidà azy izay, saingy mafy loatra moa ilay fitiavan-tseza ka atao ahoana!

Tsy atao imason’olona fa mafy ihany ity mahazo ny filohan’ny HAT ity. Mitondra ny anarana filoham-panjakana kanefa tsy mahazo mitarika ny matso eny Mahamasina! Sahala amin’ny hoe mpiasa iray ao amina orinasa no lasa manome “mise à pied” ilay PDG. Moa va tsy « bonbon olona » sisa ilay filoha tale jeneraly ? Ahitan-javatra mihitsy rangahy eto amintsika a ! Dia ny jeneraly Rakotoarimasy Lucien koa ve izany no hanao ilay kabary mahazatra mialohan’ny afomanga ? Tsy mbola nisy tahaka ity indray mitoraka ity hatramin’izay; rehefa tsy mitarika ny matso ve izany ny filohan’ny HAT dia nofoanana avokoa ny lanonana rehetra? Sahala amin’ireny zaza manao baolina ireny, raha vao resy dia entin’ny tompony mody ny baolina.
Ary ny tena loza dia ity, tsy misy mety hanangan-tsaina ny isam-baravarana raha mbola ireo « bonbon olona » ireo no mitondra ny tany sy ny fanjakana. Matimaty foana ihany ireo mahery fo tamin’ny tolona 1947 raha izao no izy. Midika izany fa tsy mankasitraka ity fitondrana HAT ity intsony ny maro an’isa. Fa inona loatra aza no tsy hametrahan’izy ireo fialàna e? Hiandry hatezeram-bahoaka sy fitsaram-bahoaka tahaka ny fampitandremana nataon’ny kandidà Fleury Rakotomalala sa hiandry ny fidinana an-dalambe hotarihan’ny HFM? Tokony mba hieritreritra ihany ireto mpitondra ireto; tsy mahafinaritra mihitsy ange le ampitovian’ny vahoaka amin’ny “bonbon olona” amin’ny ora farany e!