« Pardon m’se ! »

12/06/2013

Fiandrianam-pirenena e ! Izao fiandrianam-pirenena izao hatrany no masaka ao am-bavan’ny filoha Rajoelina isaka ny mandray fitenenana, indrindra rehefa avy voavely kibay tany am-pitandranomasina tany ny tenany. Dia mba kevoka ery ireo manamboninahitra mpomba ny fitondrana, manaraka izay lazain’ny filohan’ny HAT. Izao anefa voatery tsy maintsy hanao « pardon m’se !» rehefa mivoaka sy miditra ny seranam-piaramanidin’Ivato. Orinasa tsy miankina frantsay izany indray mantsy no hisahana ny fanaraha-maso ny olona ary ny fitiliana ny entana mivoaka sy miditra eny. Nanomboka naka ny toerany omaly ity orinasa tsy miankina ity; voaroaka tao amin’ny biraony mihitsy aza ny sampan-draharaha iray nisahana ny fanaraha-maso ireo mpiasan’ny seranam-piaramanidina; izany porte 10 izany e!

Ilay vavahady manamarika ny maha firenena an’i Madagasikara mihitsy izany izao no eo am-pelatanan’ny vahiny. Ny vahiny no tompon’ny teny farany amin’izay entana mahazo miditra sy mivoaka. Aiza ho aiza amin’izany ilay fiandrianam-pirenena? Dia mangiana manoloana izany toe-javatra izany ireto manamboninahitra mpanara-drenirano ireto satria ny mpitondra HAT no nifanaraka tamin’ilay orinasa vahiny, hiambina ny vavahadin’i Madagasikara. Adinon’izy ireo angamba fa isan’ireo olona hanao “pardon m’se” isaka ny hivoaka sy hiditra eny amin’ny seranam-piaramanidina izy ireo.
Ndrao mba farendreham-pirenena kosa àry no tian’ny mpitondra hambara; vava tsy misokatra fotsiny! Nenjehina tahaka ny inona ny fitondrana Ravalomanana tamin’ny fotoana nandraisan’ireo vahiny anjara tamin’ny fibaikoana teo anivon’ny Foloalindahy ny taona 2009. Izao nefa vahiny mihitsy no nomena ny fahefana feno amin’ny fivezivezen’ny olona sy ny fananany eny amin’ny seranam-piaramanidina Ivato. Tsy sanatria fankahalana vahiny akory no hilazana izao zava-mitranga izao fa mba ho fampieritreretana ny olom-pirenena manoloana ny zavatra ataon’ity fitondrana HAT ity. Dia mipetraka ny fanontaniana: inona no nisamborana an’ilay teratany israeliana, Joseph Akiva, raha hanao “pardon m’se” ihany ankehitriny?