Ao àry re e !

13/06/2013

Dia midongy an-kanina sahala amin’ireny zaza tsy tapaka tadim-poitra ireny mihitsy ny filohan’ny HAT amin’ity fitiavan-tsezany ity. Tsy maintsy izy hono no filoha amin’izay fanapahan-kevitra rehetra hivoahana amin’izao krizy izao, ka na hiroso amin’ny fampiharana ny Tondrozotra ny Malagasy na ho amin’ny lalàna nosoritan’ny FFKM, dia izy ihany hono no filoha. Maninona nefa raha izy foana no atao filoha e? Mba ratsy fanahy kosa isika e! Izay kosa àry no mba tiany ka inona no hampifilafilàna azy amin’izany. Dia izay hampisalotra azy izany ve no hatao olana; izy aza mba manaiky tsy hitarika ny matso amin’ny 26 jona ka inona indray no mbola tadiavintsika. Ao àry re ! Ianao foana no filoha dia aza midongidongy eo intsony fa mahasosotra. ‘Zany an!

Izay ry reto no atao a! Na iza na iza lany amin’ny fifidianana filoham-pirenena eo dia izy foana no filoha. Hanamboatra lapam-panjakana vaovao isika fa aleo ho azy Ambohitsorohitra sy Iavoloha, toraka izany koa ireny bemôtô mpisava lalana ireny. Mety izay sa mbola ampiana? Ao àry re e! Aleo hono izy ry reto no hikabary isaka ny faran’ny taona sy taom-baovao a! Izay miteny kely iny koa ve no hilàna voa tsy ary aminy eo. Ahoana tsara? Ao ary re e! Izy hono izany no miteny eny amin’ny lapihazon’ny Firenena Mikambana aorian’ny fahazoan’i Madagasikara ny fankatoavana iraisam-pirenena e! Iny kosa ry reto no mba tena nahafatifaty azy nandritra izay efatra taona izay a!
Mbola inona indray e? Ao àry re e! Aza esorina hono ry reto ny sariny any amin’ny biraonareo any a! Ataovy eo an-kavanany hono ny sarin’izay filoha vaovao eo raha sanatria ka tsy izy no lany. Izay sary avy koa ve moa hampaninona e! Hitady poster sy calendrier aza atao mainka fa sary efa vita anaty cadre tsara izao kosa. Ary aza midongidongy eo intsony moa fa mahamenatra e ! Fa ahoana ihany, tsy mbola ampy ve ireo rehetra ireo e? Ao àry re e! Aleo hono tsy asiana izany fifidianana izany fa tonga dia tenenina fotsiny ny CES hanambara fa izy no filoha e! Mety mihitsy izany, mankaleo be ity sady tsy an-tany tsy am-parafara ity.