Feno ny kapoaka !

14/06/2013

Tsy filàna dera na te ho fanta-bahoaka intsony kosa angamba no azo hilazana ny fihetsika nasehon’ny kandidà Vahombey omaly teny Antaninarenina, fa mariky ny fahafenoan’ny kapoaka noho ny zavatra ataon’izao fitondrana HAT izao. Feno fahasahiana tokoa ity kandidà ity ary hita teny amin’ny endriny fa tsy mahazaka ny fandrebirebena sy ny famitaham-bahoaka ataon’ireo mpitondra intsony ny tenany.

Porofo iray mitohoka amin’ny tenda koa anefa iny zava-niseho omaly iny fa tsy misy paika matotra ny fiarovana sy ny fiambenana iny faritra manodidina an’Antaninarenina iny. Efa nahavita nilanja ny sorabaventy hatreo amin’ny tsangambaton’ny 7 febroary, nivazavaza nandritra ny minitra maro i Vahombey, mbola tsy nisy singana mpitandro filaminana iray akory. Efa nikabary teo anoloan’ny tsangambaton’ny filoha Philibert Tsiranana nandritra ny fotoana maharitra ny tenany vao indro tsemboka nihazakazaka avy any ny Emmo ; afaka 30 mn taorian’izany vao nigadona ireo mpitandro filaminana nandeha an-tongotra nilanja basy. Tsy mahavita na inona na inona araka izany ireo mpiambina ny lapam-panjakana sy ny mpitandro filaminana, rehefa petahana tampoka tahaka ny nanaovan’ny kandidà Vahombey azy ireny.
Samy naneho ny tsy fankahasitrahany izao fitondrana HAT izao avokoa ireo olona nitafa tamin’ny kandidà Vahombey omaly. Feno ny kapoaka ! Izay no azo hamintinana ny resaka sy ny adihevitra nataon’ireo olona teny an-toerana. Samy mihaiky avokoa ny rehetra fa tsy izy intsony ny HAT; samy miteny daholo koa fa feno ny kapoaka. Saingy izao, mbola io ihany ilay fanjakana. Im-betsaka no nandrenesana ny hoe “kely sisa”, kanefa raha izao zava-misy izao no dinihana dia mbola “ho ela”, mba tsy hilazana fa aman-taonany.
Tamin’ity fitondrana Tetezamita ity vao nisy izany hoe kapoaka feno tsy mety mitobaka izany mihitsy. Firy amin’ny Malagasy no manana fahasahiana mitovy amin’i Vahombey? Adinon’ity kandidà ity tokoa angamba fa ny vahoaka noana tsy mitolona ary tsy midina an-dalambe izany, na feno sahala amin’ny inona aza ny kapoaka!