Dabam-pitarainana

17/06/2013

Dia asa loatra re olona izay hitranga mandritra io Repoblika faha-efatra io. Ho afaka hiasa sy hanatanteraka ny programany tokoa ve izay ho lany filoham-pirenena eo ? Toa maha kely finoana ihany izany raha ny zava-misy sy efa manangasanga amin’izao fotoana. Hiraraka tahaka ny havandra mantsy ny fitarainana sy ny fitoriana aorian’izao fitondrana HAT izao. efa mazaba ohatra fa hitondra ny raharaha eo anivon’ny sehatra iraisam-pirenena noho ny zavatra nataon’ny mpitondra HAT azy ny orinasa SRDI, izay tokony hiantoka ny asa ataon’ny CSPI amin’izao fotoana eny amin’ny seranam-piaramanidina Ivato.

Hiandry fitondrana ara-dalana sy voafidim-bahoaka mihitsy izy ireo vao hanetsika ny raharaha na dia eo aza ny fatiantoka maro efa zakain’ny orinasa. Maro amin’ny olom-pirenena niharan’ny tsy rariny nandritra izay efatra taona izay koa anefa no hanenjika ireo izay nahavanona izany, amin’ny fotoana hijoroan’ny fitondrana ara-dalana.
Ho lasa dabam-pitarainana mihitsy izany izay fitondrana hijoro aorian’ny fifidianana. Fitoriana atsy, fitarainana eroa! Ny fanjakana sy ny vahoaka Malagasy ihany koa no mbola hizaka ny fandoavana ny onitra isan-karazany amin’izany. Ny fanagiazana ny kaonty sy ny fananan’ny mpitondra HAT araka izany no tokony himasoan’izay filohan’ny Repoblika faha-efatra, mba tsy ho ny fanjakana sy ny vahoaka 20 tapitrisa nihafy nandritra izay efatra taona izay no mbola hanefa ny onitra sy ny lamandy amin’ny hadalan’ny mpitondra Tetezamita. Tena tsy miraharaha izay hanjo ny firenena mihitsy ny mpitondra. Bizna! Bizna hatrany!
Madagasikara no firenena mitàna ny laharana voalohany amin’ny isan’ny mpitondra fanjakana (34) ao anatina fitondrana iray; fa mbola isika ihany koa no hitàna ny laharana voalohany amin’ny fandraisana fitarainana sy fitoriana amin’ny Repoblika faha-efatra. Dia sahy milaza ve izay filoha ho lany eo fa hanam-potoana hanatanterahana ny programany manoloana ny olana rehetra naterak’ity fitondrana HAT ity? Tsy horesahana intsony ny fahapotehan’ny foto-pisainana noho izay gaboraraka nandritra ny efatra taona niainan’ny Malagasy tao anatin’ny fanjakana tsy tan-dalàna izay!