Kandidà, filoha, champion !

18/06/2013

Hitanaraeo fa mety ilay tetika a ! Falifaly ery i Andry Rajoelina rehefa nekena avokoa izay sitraky fony: sady filoha no kandidà; champion e! Mba miramirana koa ange ny “kof’roc” rehefa mahomby ny torohevitra nomeny e! Tadidintsika tsara angamba ilay hoe “ao ary re fa ianao foana no filoha, ao ary re fa tsy alàna eny amin’ny biraom-panjakana mihitsy ny sarinao, ao ary re fa mbola ianao no hikabary amin’ny 26 jona sy taom-baovao ary faran’ny taona e!”. Dia iny izy falifaly miramirana nihazakazaka tany Toliara sy nisora-tena ho champion iny. Izay fotsiny ange re olona no mba tadiviany e! Maninona mihitsy moa raha ampiana hoe “ary re fa ianao no lany e!”, amin’izay mba tena hipoky ny hafaliana tsy omby tratra ny champion-tsika e!

Izy indray kosa aloha rehefa faly dia tena mibitabitaka mihitsy e! Adinony avokoa ny zavatra miandry azy aorian’izao Tetezamita izao ary tena miezaka mafy ny hampifaly azy mihitsy ireo manodidina azy. “Premier tour io de vitatsika président a! Tsy mbola nisy olona tahaka ireny teto Toliara! Mbola tena mamy hoditra amin’ny vahoaka mihitsy ianao président!”, sns. Voahosotra tantely avokoa ny vavan’izay nandray fitenenana. Hafaliana nge izany re olona marina mafy e ! Izay no mba anjara biriky kely avy amin’ny “kof’roc” e! Mitady izay hevitra hamalifaliana ny kandidà, filoha, champion Andry Rajoelina.
Izay foana nge re olona no hitenenana antsika hoe homeo azy izay tadiaviny e! Tsy mba mahafinaritra antsika ve ny mahita azy falifaly miramirana tahaka ireny e? Kandidà filoha tany am-boalohany; izao indray notovonana champion kely. Sao dia tsy champion nefa? Ao ary re fa champion e! Hitanareo, hita soritra eny amin’ny endriny mihitsy ny hafaliany rehefa ekena izay tadiaviny. Kandidà, filoha, champion! Kandidà, filoha, champion! Kandidà, filoha, champion! Mpanao politika iza kosa àry no mahafeno ireo fepetra telo ireo? Ao ary re fa ianao irery e! Matinao aho sombiniaikosoa !!