Ho hita ny dôziny !

19/06/2013

Fihantsiana tsotra izao no fandikan’ireo kandidà filoham-pirenena ny kabary nataon’ny champion Andry Rajoelina tany Toliara farany teo. Kevokevoka loatra ity kandidà iray ity isaka ny mahazo micro; hany ka mibolisatra lava izao. Tapa-kevitra hitsapa ny dôziny tokoa mantsy ireo kandidà rehetra mpifaninana aminy. Mampahatsiaro ny kabarin’ny filoha teo aloha Marc Ravalomanana ny volana janoary 2009 iny fanambarana nataon’ny champion Andry Rajoelina iny. Hoy indrindra ny filoha teo aloha: “tsapao aloha ny herinao vao mitsapa ny herin’ny hafa!”. Inona akory no teo, hay “dessin animé” rehefa notsapain’ny olona. Dia mbola izay fomba fihetsika manambony tena izay indray koa no nataon’ny champion Andry Rajoelina. Hotsapain’ny olona amin’izay koa mantsy ny dôziny dia hiaraha-mahita eto.

Ny fialàn’ny champion eo amin’ny fitondrana mihitsy mantsy no tanjon’ireo kandidà mivondrona. Tsy hisy fifidianana izany tokoa aloha eto raha mbola ny champion Andry Rajoelina sy ny forongony no eo amin’ny fitondrana e! Ho hita tsy ho ela ny dôziny amin’ity indray mitoraka ity. Ela nitoratorahana mantsy ka nahavoa voamason’angatra! Mahafinritra an’ny champion Andry Rajoelina tokoa ity mamaky ady etsy sy eroa ity; tena champion marina ny tenany amin’izay lafiny iray izay. Iza no nanam-po fa ingahy Voninahitsy Jean Eugène sy Hajo Andrianainarivelo no lasa fahavalon’ny champion Andry Rajoelina! Tofoka amin’ity vavabe isaka ny mahazo micro ity tokoa angamba ny olona e!
Mazava izany izao ny resaka; hotsapain’ny olona amin’izay ny dôzin’ny champion Andry Rajoelina. Ho hita eo raha vitany hitazona izany anaram-boninahitra izany. Tandremo fotsiny ndrao lasa gros outsider eo ka hiverina hikosoka kapila tsy fidiny. Hatreto aloha dia mbola izy no champion. Champion amin’ny fampahoriam-bahoaka, champion amin’ny jadona sy ny ramatahora, champion amin’ny fivadibadihan-dela, champion amin’ny tsy fanarahan-dalàna, champion amin’ny filàna ady etsy sy eroa, sns. Ho hita ny dôziny!