Mamaky takotra!

20/06/2013

Somary nahavariana ny maro ihany ny fihetsik’ireo CST nalàn’ny champion Andry Rajoelina tsy ho isan’ny mambra ao amin’ny Filan-kevitra Ambonin’ny Tetezamita. Niakatra afo mihitsy ny sasany ary nilaza ny hitarika olona hidina an-dalambe ho fanoherana izany. Fa taiza ianareo tamin’ny ora nidona e? Rehefa ny karama sy ny tombotsoanareo CST ve izany no voatohintohina dia ny vahoaka no tadiavinareo hatao fitaovana hamerenana izany? Oviana ianareo CST no mba niraharaha sy naka ny hevitry ny vahoaka nandritra izay efatra taona izay? Hetsika an-dalambe firy izay nataon’ny vahoaka nandritra ity Tetezamita ity izay, fa taiza ianareo tamin’izany ora sy fotoana? Tsy izao ve ilay antsoina hoe “taitra irery vao mamaky takotra e?”.

Raha tena sahy ianareo, mandeha midina an-dalambe mba mizaka izany ‘krimôzenan’ny Emmo izany fa aza mitarika vahoaka efa sempotry ny fahantrana. Ny fialanareo CST rehetra mpihinam-bolam-bahoaka ireo mihitsy aza no faniriana, Filan-kevitra Ambonin’ny Tetezamita tsangan’olona, tsy mahatapaka ahitra sy mpanambaka vahoaka. Efatra taona izao ianareo voky hatreny an-tendakelinareo, tsy nahatsiaro ny fahoriam-bahoaka. Rehefa nokakerin’ny amboakelitianareo ianareo vao hoe blablabla! Zakao irery ao ny anareo, mifamakia vava sy orona ao Anosy ao. Inona rahateo koa moa no mba asa mivaingana vitanareo nandritra izay fotoana nihinananareo ny volam-bahoaka izay e! Aleo mba ny hafa indray no hitsentsitra ny hatsemboham-bahoaka.
Izay no zava-misy eto amin’ity firenena ity. Hain’ireo mpanao politika mihitsy ny miventy izao vahoaka izao rehefa voatohitntohina ny tombotsoan’izy mianakavy. Tsy ny vahoaka velively no nanendry anareo, tsy voafidim-bahoaka rahateo koa. Heverina araka izany fa diso adiresy ianareo raha miantso ny vahoaka amin’izao fandroahana anareo tsy ho isan’ny mpikambana ao amin’ny CST izao. nitaraina sy nidradradradra noho ny fahoriana mianjady aminy nandritra izay efatra taona izay ny vahoaka, toa tsy renareo akory na nodiana tsy re, taitra irery izao ianareo vao mamaky takotra sy mimenomenona sahala amin’ny Sinoa very entana!