Rain’Itetaka !

02/07/2013

Vao nahita an’i Jean Marc Koumba niantoka ny fiambenana ny kandidà Lalao Ravalomanana ry jeneraly be isany dia raiki-tahotra avokoa ka nampiantso ity mpahay haiady ity hampihorohoroana teny amin’ny section de recherche Fiadanana. Maro amin’ireo manamboninahitra mitàna andraikitra amin’izao fotoana izao mantsy no nahita raharaha teny amin’ny kianjan’ny 13 may ny taona 2002, nandritra ny hetsi-haboaka nandrodana ny fitondran’ny amiraly Didier Ratsiraka. Mampanofy ratsy azy ireo ny fahitàna an’i Jean Marc Koumba ka izany no anton’ireny fampihorohoroana omaly ireny. Hay « rain’Itetaka » daholo ireto manamboninahitra mpanongam-panjakana ireto rehefa dinihina. Mbola aiza izany rehefa ny vahoaka no mijoro eo anoloanareo!

Re koa mantsy izao fa noho ny tahotr’ireto manamboninahitra mpanongam-panjakana ireto ny amin’ny fodian-dRavalomanana Marc no mahatonga azy ireo handeha tsy misy jiro tahaka ny jamba milomano. Matahotra ny ainy sy ny an’ny vady aman-janany mantsy hono ireo manamboninahitra. Dia gaga elah! Fa angaha nanao ratsy teto amin’ny firenena no matahotra tahaka izany? Fa angaha tsy mafy be indray e? Toa lasa “rain’Itetaka” tampoka teo rehefa mitady ho tampina ny daomy. Aiza re ‘zany e! Raha tena mahery ianareo manamboninahitra mpampihorohoro vahoaka ireo, tereo amin’ny kalachnikov sy ny ‘krimôzena tahaka ny nataonareo tamin’ny vahoaka sy ny praiminisitra Eugène Mangalaza ny Fianakaviambe Iraisam-pirenena hanaiky an’ny champion.
Mbola haverina eto indray fa efa hitan’Antananarivo daholo izany FRS, TTS, GMP, RESEP, REGAP ary GP izany ary samy mafy be daholo, saingy tsy nisy nahita ny lavaka nanitrihana ny lohany rehefa nivadika ny vahoaka. Koa raha tena mafy ny jeneraly Lucien Rakotoarimasy, Ranto Rabarisoa, Randrianazary ary Ndriarijaona André, ndehana tereo hankato izao fitondrana izao sy hanaiky an’ny champion ho filoham-pirenena ny SADC sy ny Vondrona Afrikana ary ny Fianakaviambe Iraisam-pirenena tsy an-kanavaka fa aza “rain’Itetaka” tahaka izao. Naninona mihitsy raha nambanana tamin’ny basy (izay ihany mantsy ho hainareo) mba hanatrika ny matsonareo ireo diplaomaty sy ambasadaoro! Efa tampina tanteraka ny daomy vao may volon-tratra. Rain’Itetaka tssssssss!