Ny fananany ihany !

03/07/2013

Toa hoe manaiky ny vahaolana naroson’ny FFKM ny Champion Andry Rajoelina, izany hoe manaiky ny fodian’ny filoha teo aloha Marc Ravalomanana ary ny famoahana ireo gadra politika am-polony maro nandritra izay efatra taona izay. Tsy efa nambaran’ny Kof’Roc teto fa manaiky izay rehetra tenenina aminy i Champion raha vao ny fananany no voatohintohina ! Tany amin’ny haingom-batony mihitsy no nokitihan’ny Fianakaviambe Iraisam-pirenena farany teo, dia ny figiazana ny fananany rehetra any ivelany. Tsy fantatry Champion intsony ny fisian’i Naivo Raholdina sy Augustin Andriamananoro ary Annick Rajaona raha vao io fananany nikelezany aina nandritra izay efatra taona izay no mitady hovoakitikitika. Ny fananany ihany no ady eo!

Izao vaky bantsilana indray koa fa mihoatra ny 150 miliara ny volam-bahoaka nahodinkodin’ity HAT an’ny Champion ity. Mitombo ihany ny lapoaly mitaritarika mankarenin-tsofina, ankoatra ny raharaha 26 janoary 2009, sns. Izy tokoa no Champion amin’ny fivadibadihan-dela sy fitiavan-tena rahatoa ka tsy fantatr’ireo mpanompony. Tsy misy hatakalony ny fananany ary mbola io fananany io aminy no Fiandrianam-pirenena sy Fitiavan-tanindrazana. Izay no maha Champion azy, tsy misy havelany handrombaka ny fananany iza ny mihitsy na iza na iza.
Mahazo miteny izay tiany hambara ny mpomba an’ny Champion saingy izao no tokony hofantatr’izy ireo: tsy atakalony ny fananany izany ianareo. Tsy mampanino azy ny mamadika namana raha vao ny tombotsoany no voatohintohina. Porofon’izany ireo mpanao politika nanao sorona ny ainy teny amin’ny kianjan’ny 13 may ny taona 2009, voadaka am-bava-fo tsy fidiny. Toraka izany koa ireny manamboninahitra niara-nitolona taminy, raha tsy hiresaka afatsy ny kolonely Charles sy ny jeneraly Rakotonandrasana Noël. Ny fananany ihany! Mampahatsiahy ny tenin’ny ministra teo aloha Organès Rakotomihantarizaka nanao hoe: “miomana ianareo fa ho avy ny Fitsarana!”. Aleo samy hotsarain’ny nataony eto e!