Vroom !

04/07/2013

Manafana motera hiatrehana ny fanonganana an’ny Champion eo amin’ny fitondrana ireo mpikambana ao amin’ny Filan-kevitry ny Tetezamita, mivondrona ao anatin’ny « cellule de crise », tarihin’ny filohan’izany vondrona izany, Ranjivason Jean Théodore. Vroom ! Vroom ! Izay no hiaka nanentanana ireo olona tonga nanatrika ny fihaonana voalohany tetsy amin’ny Trois Frères Andrefanambohijanahary.

Turbo 16 mihitsy angamba ity fiara ho entin’izy ireo ity. Fito andro ihany mantsy no fe-potoana nambaran’ny “cellule de crise” ho faharetan’ity hetsika ho fandrodanana ny jadona ity. Haingam-pandeha lavitra noho ny TGV an’ny Champion ity fiara iray ity raha ny fanazavana hita ao amin’ny fiche technique. Roa volana sy tapany tokoa mantsy vao voazeran’ny TGV ny filoha teo aloha Marc Ravalomanana, nisy fotoana aza maty an-dalana mihitsy ny lamasinina taorian’ny 26 janoary nirehetan’Antananarivo.
Mampametra-panontaniana ny maro kosa anefa ny ho mpamily an’ity turbo 16 nitretrena tetsy amin’ny Trois Frères ity. Mpamily efa manana traikefa amina compétition avo lenta no tokony hitondra ilay fiara raha tsy izany hivantana any an-kady na koa hidona amin’ny poteau. Sarotsarotra ihany anefa ny hahitàna mpamily zatra hazakazaka avo lenta mbola am-perinasa amin’izao fotoana. Toa ireo mpamily efa fahitan’ny olona nandritra izay 10 taona lasa izay ihany no tazana teny an-toerana. Tsy azo lavina fa tena manana traikefa tokoa izy ireo kanefa tanora mandrovi-tsihy sady efa misora-tena ho Champion no mpifanandrina.
Izay rehetra nitsapa ny herin’ny motera omaly aloha dia hita fa tena resy lahatra sy tapa-kevitra avokoa e! Marevaka tsara ihany koa ny lokon’ny fiara. Ry Masters kalaza amin’ny fanamafisana ny carrosserie-n’ny fiara angamba sisa no andrasana dia raikitra ny lalao. Efa tsy mahatombona sahady ireo mpiloka any amin’ny sisiny, miandry izay hiakaran’ity turbo 16 ity eny amin’ny podium. Vroom! Vroom! Vroom!