Angady mondry

09/07/2013

Tsy isalasalana intsony ny milaza fa iray amin’ireo ministera tena anjakan’ny tsy fanarahan-dàlana ampahibe-maso tanteraka ity ministeran’ny Serasera ity. Iza tokoa moa amin’izao fotoana izao no tsy mahita fa mirongatra izay tsy izy ny fananganana radio na televiziona any amin’ny faritra. Torak’izany ny eto Antananarivo, izany hoe eo ambany saokan’ny ministera mihitsy. Tranga izay mampametram-panontaniana ny maro tokoa satria raha araka ny tokony ho izy dia mihantona mandritra ny fotoana tsy voafetra ny fanomezan-dàlana hanokatra radio na televiziona eto amin’ny tanin’ny Malagasy.

Tsy izany anefa no mitranga fa misy ihany ireo izay mahavita manangana haino aman-jery. Nahazo fahazon-dàlana avy amin’ny ministera tokoa ve ireo rehetra ireo? Izay no fanontaniana apetraky ny olom-pirenena. Raha toa ka nahazo izany izy ireo, midika ve izany fa efa nesorina ilay didy mampihantona ny fanomezana fazoan-dalana hanangana radio sy televiziona? Ary raha izay no zava-misy, nahoana no tsy nampahafantarina ny be sy ny maro izany, mba hahafahan’ny hafa manangana ihany koa, na fara-faharatsiny mifaninana amin’ny tolotra momba izany?
Ara raha toa ka mbola manankery ilay fandraràna, nahoana ary no tsy arakarak’ilay fasahiany tamin’ny fanakatonana radio no ataon’ny ministeran’ny Serasera manoloana ny fiantsiana mibaribary sy ny fandikan-dàlana ampahibemaso ataon’ireo izay sahy nanangana radio sy televiziona ireo? Marihina fa misy amin’ireo izay manangana haino aman-jery any amin’ny faritany no mialokaloka amin’ny hoe “fanitarana”. Raha ny lalàna manankery eto amin’ny firenena mikasika ny fananganana haino aman-jery anefa no jerena dia tsy azo atao velively izany “fanitarana” na fananganana radio sy televiziona masoivoho any amin’ny faritra izany. Izany hoe, raha vantany vao manangana radio na televiziona vaovao any amin’ny faritra ny mpandraharaha iray dia orin’asa vaovao eo anatrehan’ny lalàna izany fa tsy azo sokajiana ho fanitarana velively. Raha tsy izany dia milefa hetra sy manitsakitsaka ny lalàna momba ny haino aman-jery izy.
Aiza ho aiza ary, eo anatrehan’izany, ny andraikitry ny ministera miadidy ity sehatra ity ? Sa efa nisy ny fifanarahana manokana tany ho any, izay tsy mahagaga raha amin’izao tetezamita izao? Na izany na tsy izany, eo imason’ny mpanara-baovao dia angady mondry ihany ity ministera ity, satria tsy maintsy hisy fiantraikany any amin’ny fanampahan-keviny izao firongatry ny tsy fanarahan-dàlana eo amin’ity sehatra ity izao.