Sarim-bavy !

10/07/2013

Tsy izay tsy mandrahona ny handrodana ity fitondrana HAT ity tato anatin’ny volana maromaro izao : HMF, Cellule de crise eo anivon’ny CST sy ny mpiasam-panjakana. Toraka izany koa ireo grevy etsy sy eroa raha tsy hilaza afatsy ny mpiasan’ny Ladoany sy ny IGE. Raha ny lahateny sy ny kabary aloha dia tena raitra ary sahala amin’ny hanao zavatra mihitsy. Rehefa dinihana anefa toa karazan’ny vovon’alika ihany izany rehetra izany, tsy hery fa tahotra. Ratsiratsy kokoa noho izany aza ny ahiahin’ny mpitazana ary misy mihitsy ireo milaza fa ny mpitondra HAT ihany no ao ambadik’izy ireny.

Afon’angatra daholo aloha hatreto ireny fandrahonana etsy sy eroa ireny ary mety mitombona mihitsy io petra-kevitra milaza fa ny mpitondra no mandrehitra ny afo, izy ihany mazava ho azy no mifehy azy. Matahotra ny hisian’ny grevy tena izy, izany hoe fitokonana tsy misy dian-tanan’ny mpitondra ireo atidoha eo anivon’ny HAT. Aleon’izy ireo mamorona fitokonana na grevy azo fehezina ho an’ny amin’ny fitohizan’ny fe-potoana hijanonana eo amin’ny fitondrana. Izay no hilazana etoana fa vovon’alika avokoa ireo mihetsiketsika amin’izao fotoana ireo fa tsy tena ilay fitakiana miainga avy amin’ny vahoaka sy ny tombotsoam-bahoaka.
Raha tena mihevitra marina ny tombotsoan’ny firenena ireo mpiasan’ny Ladoany, inona no tsy hanambaran’izy ireo ampahibemaso ireo hosoka sy trafika maro isan-karazany mahakasika ireo mpitondra HAT, inona no mbola andrasan’ny mpiasam-panjakana tsy hampikatso avy hatrany ny fampandehanan-draharaham-panjakana, inona no misakana ny SEMPAMA tsy han idy ny varavarany, sns ? Vovon’alika rano fotsiny mba tsy hilazana fa famitaham-bahoaka, dia ilay vahoaka efa sasatry ny miandrandra ny anjara masoandrony, mitoto tany sy lanitra hifanaranan’izao krizy izao.
Ambara ombieny fa miaramila vitsy an’isa no miara-dia amin’ny HAT, dia aiza àry izany ireo maro an’isa e ? Ny azo antoka aloha dia ny hoe : ny voay tsy mihinana ny namany. Vovon’alika avokoa ireny fanambarana avy amin’ireo manamboninahitra sy manamboninahitra lefitra milaza no tsy mankasitraka izao rafitra izao. Ny mpitondra ihany no ao ambadik’ireny hetsika sarim-bavy ireny.