Mamy ny miaina!

12/07/2013

Mandrahona hidina an-dalambe daholo izao ireo hery velona rehetra manomboka amin’ny mpiasam-panjakana hatramin’ny antoko politika. Leo sy tofoka amin’izao fikatsoan’ny raharaham-pirenena izao ny olona noho ny fizirizirian’ireo mpanao politika tsy misaina ny fahoriam-bahoaka. Mivoaka tsikelikely ihany koa, etsy an-danin’izany, ireo raharaha maloto mahakasika fanodinkodinam-bolam-bahoaka nataon’ireo mpitondra HAT mpiara-dia amin’i Champion. Ry zareo avy ao amin’ny IGE no nitarika izany ampamwak izany tamin’ny fanambarana ny fisian’ny vola 150 miliara fmg nangalarin’ny mpitondra fanjakana. Tsy maintsy hidina an-dalambe ny vahoaka, na ireo ambasadaoro vahiny aza efa resy lahatra ny tsy maintsy hatongavan’izany fidinana an-dalambe izany ary tsy ho ela.

“Firy àry ny isantsika hahazoana manao plisy?”, hoy i Tselonina izay. Mba manao kajikajy ihany koa ry zareo ao amin’ny fitondrana ao amin’izao fotoana saingy ny isan’ny seza ao anatin’ireny “jet privé” ireny no haverimberina isaka ny iray minitra. Voafetra tokoa ny isan’ny mpandeha zakan’ireny “jet privé” ireny, tsy mba toa ilay TGV noterena hizaka ny tsy eran’ny ainy. Tsy afaka hitety ranomasimbe handosirana any ivelany koa anefa ilay TGV amin’ny fotoana sy ora hidinan’ny vahoaka an-dalambe. Hovidian-dafo araka izany ny seza iray ao anatin’ilay “jet privé”; tsy mahazaka izay rehetra nohariana nandritra ny Tetezamita rahateo koa.
Tsy vao izao akory no nisian’izany teto amin’ny firenena. Adinon’ireto mpitondra HAT ireto sahady angaha ny nanjo an’ Lahady Samuel, tamin’ny fotoana nandosiran’ny amiraly Didier Ratsiraka tany Frantsa ny taona 2002? Moa tsy nataon’ny Zanadambo trano fisotroan-toaka fotsiny ilay helikôpteran’ny DECAGON tao Ambodiantafana? Mandritra ireny fotoana ireny vao tsapan’ny mpitondra sy ny forongony fa mamy ny miaina. Mandritra ireny fotoana ireny vao fantatr’izy ireo fa tsara loatra izany mifankatia sy mihavana izany. Mandritra ireny ora sy minitra ireny vao eken’izy ireo fa tsy mahatohitra ny herim-bahoaka mihitsy izany basy aman-tafondro izany. Mandritra ireny ihany koa tsapan’ireo jeneraly fa tsy misy ilàna ireo kintana eny am-bozonany akory.