Aok’izay Lafrantsa a!

16/07/2013

Nahatohina Malagasy maro ny kabarin’ny ambasadaoron’i Lafrantsa, nandritra ny fanamarihana ny tsingerin-taonan’ny fahaleovantena Frantsay ny faha-14 jolay lasa teo. Miendrika fanambaniana ny Malagasy mihitsy ho an’ny sasany ary maro rieo nandefa mail teto amin’ny La Nation, kanefa noho ny fepetra tsy maintsy tandrovina amin’ny asan-gazety dia ialana tsiny amin’ireo mpiray tanindrazana raha tsy afaka namoaka izany.

Ireto teboka vitsivitsy ireo no nitovizan’ny fomba fijerin’ny rehetra : tsy ny governemanta Frantsay velively no tokony hanome lesona ny Malagasy sy hitsara ny mpiray tanindrazana noho izao zava-misy eto amin’ny firenena izao. Ireo mpitondra Frantsay no tao ambadiky ny fanonganam-panjakana ny taona 2009 ka tomponandraikitra feno amin’izao fahorian’ny Malagasy 20 tapitrisa izao izy. Izy ireo ihany koa no migoka sy mangorona ny harem-pirenena, nanomboka tany amin’ny fanjanahantany hatramin’izao. Ao anatin’izany ireo teratany karana mizaka ny zom-pirenena frantsay manao ampihi-mamba ny tontolon’ny asa fandraharahana, eo indrindra koa anefa ireo Malagasy saribakoliny toa ny mpitondra amin’izao fotoana.
Tsy tsinin’ny vahoaka Malagasy 20 tapitrisa mihitsy akory rahatoa ka tsy nahavita nanatanteraka ny iraka nampanaovina sy nankinin’i Lafrantsa taminy ny filohan’ny HAT sy ny forongony. Toa fomba mahazatra ireo mpitondra Frantsay sy ny mpiara-dia aminy rahateo ity mivadi-dela ity, tahaka ny nanjo an’i Kadhafi izay namatsy vola ny propagandin’i Nicolas Sarkozy, kanefa nivadihany tampoka ary maty tamin’ny fomba feno habibiana. Ny mpitondra Frantsay no firenena voalohany nankato ireto mpangongam-panjakana ireto ary nampiatrano azy ireo tao amin’ny Elysée mihitsy ho mariky ny fisaorana. Mbola i Lafrantsa ihany koa no manao izay tsy hahombiazan’ny tari-dalan’ny FFKM ary sakana amin’ny fanatanterahana ny dinik’ireo filoha efadahy.
Leo ny politikan’ny governemanta Frantsay sy ny fitsabatsabahany ny raharahan-tokantranon’i Madagasikara ny Malagasy. Na ireo teratany Frantsay monina sy mipetraka eto amintsika aza vaky vava noho izao ataon’ny mpitondra Frantsay izao. Aok’izay Lafrantsa a ! Aleo ilay gasy mba hisento kely amin’izay fa be izay vita izay e !