Aza misy miteniteny !

14/11/2012

Mazava ny hafatra, aza misy miteniteny na milaza zavatra mahakasika ny mpitondra sy ny manodidina azy intsony. Aoka izay ! Jery todika kely monja nanomboka ny taona 2009 no hisarihana ny saina. May kila forehitra ny TVM sy ny RNM, norobaina sy nodorana ny MBS. Na tiana na tsy tiana dia efa endrika fanampenam-bava sy ny fahalalahana maneho hevitra ireny fihetsika mamohehitra ireny. Tsy nijanona hatreo anefa izay hetraketra sy setrasetra nanjo ny asa fanaovan-gazety izay ary lasa fomba amam-panaon’ny mpitondra taty aoriana.

Notafihana tamam-basy ny onjampeo Fréquence Plus, nopotehina ny fitaovana ary novonoina sy noratràna ny mpanao gazety sy ny teknisiana tao aminy. Mahagaga fa tsy nisy tohiny hatramin’izao ny fitoriana napetraky ny tompon’ny Fréquence Plus sy izay rehetra naratra nandritra izany fanafihana hainoamanjery izany. Fantatra anarana, endrika hatramin’ny toeram-piasany anefa ireo miaramila nahavanona izany. Nogiazan’ny fitondrana tanteraka ny tontolon’ny fifandraisan-davitra, naato ny fanomezana fahazoan-dalana hanangana radio sy fahitalavitra. Tampina tanteraka ny vavan’ny olona tsy mitovy hevitra amin’ny fitondrana; voatery niroso tamin’ny fanaovana radio piraty ny sasany satria izay no noheveriny ho fomba nahafahany naneho hevitra.
Sahin’ny mpitandro filaminana mihitsy taty aoriana ny niditra tsotra izao tsy manana taratasy na fahazoan-dalana ho amin’izany, nanery ny talen’ny famoahana ny Le Courrier, mba hilaza ny loharanom-baovaony. Tsy nanaitra ny fitondram-panjakana mihitsy izany toa vao mainka aza nanome vahana ny fanaovana setrasetra amin’ny mpanao gazety sy ny asa fanaovan-gazety. Tsy horesahana intsony ireo “lettre de mise en demeure” maro dia maro, ny fandrahonana amin’ny endrika samy hafa ary ny fitoriana hainoamanjery sy mpanao gazety.
Raha tsorina ny resaka dia nahavita dingana goavana teo amin’ny fandrahonana sy ny faneriterena ny asa fanaovan-gazety ity fitondrana ity. Raha jadona ny fitondrana Ravalomanana Marc dia mihoatra lavitra noho izany izao fitondrana tarihin’ny filoha Andry Rajoelina izao. Tsy mbola nisy toa ireo ohatra notanisana tetsy ambony ireo raha tsy tamin’ity fitondrana Tetezamita ity. Efa tapitra manameloka izany fihetsiky ny mpitondra fanjakana izany avokoa ireo fikambanana iraisam-pirenena toa ny RSF ; toraka izany koa ireo firenen-dehibe mpandala ny fahalalahana sy ny demôkrasia.
Tokony ho nanana « courage » milaza mivantana ny sitrapony amin’ny mpanao gazety sy ny hainoamanjery ny fitondrana Tetezamita. Efa mazava anefa izany ankehitriny, taorian’iny raharaha Zakariasy Patrick, nanenjehana ihany koa ny gazety La Nation, Gazetiko ary Midi Madagasikara iny : aza misy miteniteny intsony !