Soa fianatra

19/07/2013

Nampitodika ny vahoaka Malagasy mpanara-baovao ho any Afrika Atsimo ny andro omaly. Tsy noho ity firenena ity manohy ny fampiantranoana ireo sesin-tany politika avy aty Madagasikara, ka isan’izany ny filoham-pirenena teo aloha akory, fa noho ny fanamarihana ny andro natokana ho an’ny filoha Afrikanina Tatsimo teo aloha Nelson Mandela, izay nanamarika ihany koa ny tsingerin-taona faha 95 nahaterahany omaly.

Hetsika maro samihafa, ary samy manana ny maha izy azy no nentin’ny Masoivoho Afrikana Tatsimo eto amintsika nanamarihana izany andron’i Mandela izany. Hetsika izay nentina nampisehoana ho an’ny be sy ny maro, ny maha izy azy izany olom-panjakana izany.
Arak’izany dia hita taratra tamin’ireo hetsika rehetra ireo fa lehilahy nanana ny fahambonian-toetra miavaka tokoa i Mandela. Isan’izany ny maha ohatra velon’ny fahafahana azy sy ny maha olona nanana fahasahiana sy fanetren-tena ihany koa. Ankoatr’izay dia nampiavaka azy ny ady tamin’ny fanitsakitsahana sy ny fiarovana ny zon’olombelona. Niady ho an’ny fametrahana ny demokrasia ary ny fampanjakana ny rariny sy ny hitsiny ihany koa i Mandela. Ary nanamarika ny fiakarany teo amin’ny maha filoham-pirenena azy tany Afrika atsimo ny fifamelana sy ny fanorenana firenem-baovao.
Santionany tamin’ireo fahambonian-toetra nananan’ny filoha teo aloha tany Afrika Atsimo ireo, ary hita taratra tamin’ireo hetsika nentina nanamarihana ny andron’i Mandela. Hetsika izay natao teto amin ‘ny tanin’ny Malagasy ihany koa, ary inoana fa tsy tongatonga foana ny nanatanterahana azy, indrindra manoloana izao fikatsoan’ny fivoahana amin’ny krizy eto amintsika izao.
Ny fanirian’ny maro dia ny mba hitsakotsakoan’ireo mpanao politika, indrindra ireo izay voakasika mivantana amin’ny fampikatsoana ny fivoahan’i Madagasikara amin’ny krizy ireo hetsika nentina nanamarihana ny andron’i Mandela omaly. Torak’izany ihany koa ireo izay mikasa ny hitondra ity firenena ity. Satria voaporofo tamin’ireny hetsika ireny fa ilàna fahambonian-toetra maro ny tena fitiava-tanindrazana. Voaporofo tamin’ireny ihany koa fa tsy hitondra vahaolana ho an’ny firenena velively ny fampaharetana ny tsy fanarahan-dalàna, indrindra ny tsy fanajana ny zon’olombelona. Farany isan’ny goavana indrindra tamin’ireo rehetra ireo ny fifamelana izay nanamarika ny firenena Afrikanina Tatsimo.