« Fa maninona chéri ? »

01/08/2013

Tsy nahinan-kanina maraina ny ankamaron’ireo manamboninahitra sy ny mpanao politika mpiara-dia amin’i Champion omaly raha nandre ny vaovao mikasika ny fahazoan’ireo manamboninahitra jeneraly sy kolonely voarohirohy tamin’ireny raharaha 7 febroary, FIGN, BANI Ivato ireny famotsoran-keloka na « amnistie ». Nojerem-potsiny tahaka tany nahalavoana ny jus naturel, œuf sur le plat, tartine, beurre, croissant sy pain aux raisins, ny nesquik, fromage, sns. Ndrao dia heverin’ialahy fa varisoa be rano sy voanjo sahala amin’ny any an-tranon’ialahy aza aloha ny sakafo marain’ireo mpitondra ireo e!

« Fa maninona chéri? Sa omelette au jambon no tian’la ?», hoy ramatoa. « Tsy hitan-tena ve io titre amin’ny gazety io ka jambonbon’ty inona ! », hoy kosa rangahy sady romotra mafy. « Alarobia mainty » ho an’ny mpitondra fanjakana mihitsy iny omaly iny. Ilay vady sasatra nikarakara hanim-pitoloha vao maraina indray no nahazo loza. Nanotika hatramin’ny kibony sasany raha vao nahita ny lohanteny teny amin’ireo gazety mpiseho isan’andro. Ireo zatra nampiadan-tena nandritra izay efatra taona izay moa tsy nino ny fahamarinan’ny vaovao ka nifampiantso an-tariby isaky teteky tamin’ireo mpiara-komana. Tapitra novidiana sy novakiana avokoa ireo gazety mpiseho isan’andro ary dia samy nilaza avokoa fa “tsy rariny” izao fanapahan-kevitra noraisin’ny Fitsarana izao.
Tsy rariny satria manohintohina ny fiadanan’izy mianakavy, mampitaintaina ny vady aman-janany ary mampangidy ilay vorontsiloza natao ro matsatso. Dia velona ny paikady sy tetika maizina isan-karazany: ndao hamoronana dossier vaovao mba tsy ahafahan’ireo mivoaka ny fonja, voriana haingana ny AV7 hanao fihetsiketsehana an-dalambe, alefa tsy tapaka amin’ny fahitalavitra sy ny gazetim-panjakana ireo sary sy horonantsarin’ny 7 febroary, sns. Hiraraka sahala amin’ny fasika indray ny sôsy, hanomanana izany rehetra izany. Tsy fitoniana ho amin’ny tombotsoan’ny firenena no ilain’izy ireo fa fitoniana hiadanan’ny tenany sy ny vady aman-janany amin’ny volam-bahoaka.