Fika masiso !

02/08/2013

Dia ohatra hoe fitondrana mandàla ny fitoniana sy vonona ny hampihavana izany ireny no fijery ity HAT an’i Champion ity, taorian’ireny lisitra miaramila sy zandary nahazo amnistie ireny. Fika masiso handrebirebena saim-bahoaka sy tetika hilàna dera amin’ny Fianakaviambe Iraisam-pirenena fotsiny ihany anefa izany. Iza no sahy hifanamby fa tsy ho tafavoaka ny fonja izany akory ireo manamboninahitra tena hatahoran’ny HAT toa an-dry kolonely Raymond Andrianjafy sy ny jeneraly Raoelina ! Dia naninona no tsy nomena amnistie, rehefa nanome ihany, ny kolonely Charles sy Coutiti Assolant satria ve …Insolent?

Fa nahoana moa ireo olona ireo no tsy mantsy mahazo amnistie vao mahazo mivoaka ny fonja e ? Dia ahoana izany ry Pety Rakotoniana, izay PDS-n’i Fianarantsoa kanefa mbola misazy tamin’ny fotoana nanendrena azy ! Izay no hilazana fa fika masiso fotsiny daholo ireny amnistie nomena ireto manamboninahitra ireto. Famakiana fonja tamin’ny fomba mihaja no nataon’ny HAT namoahana ireo gadra ny taona 2009. Ary ny tena loza dia olona mbola misazy, izany hoe tokony ho mbola any am-ponja, no lasa mambra ao amin’ny Kongresin’ny Tetezamita izay misolo ny andraikitry ny Fahefana mpanao lalàna. Izany hoe, ny gadra indray no mandany lalàna hampiharan’ny Fitsarana.
Gadra nomelohan’ny Fitsarana tamin’ny anaran’ny vahoaka Malagasy izao no navoaka ny fonja tamin-kery dia mbola sahy mijoro sy manasazy mpangalatra akoho sy mangahazo eny an-tsaha amin’ny anaran’ny vahoaka Malagasy ihany ireo Mpitsara eto amintsika! Halatra fiarakodia, fakàna vola an-keriny, vola sandoka, vonoana olona ary fikasàna hanonganam-panjakana izao no vesatra nanenjehana sy nanamelohana azy rehetra dia lasa hoe gadra politika tampoka teo. Fa angaha fangalarana fiara, fanaovana vola sandoka, famonoana olona ary fanonganam-panjakana no asan’ny mpanao politika eto amintsika? Izay no hilazana fa fika masiso daholo ireny rehetra ireny mba tsy hitenenana hoe masiso…fika!