Fotsy rora !

20/11/2012

Efa samy tapitra naneho ny tsy fankasitrahany izao rafitra Tetezamita tarihin’ny filoha Andry Rajoelina izao avokoa ny sehatra sy hery velona misy eto amin’ny firenena. Ny Fiangonana Katolika no ohatra goavana indrindra tamin’izany izay tena nanankiana tamin’ny fomba hentitra sy mahitsy ny zava-misy iainan’ny vahoaka. Iny fanambarana nataon’ny fiombonamben’ny Eveka eto Madagasikara iny rahateo no heverin’ny mpanara-baovao fa mari-drefy farantampony.

Tsy mampihetsika ny singam-bolon’ireo mpitondra akory anefa ilay fanambarana mihezinezina nataon’ny fiombonamben’ny Eveka. Tsy manam-basy e! Izay mitàna basy ka sahy mandrangaranga izany basy izany ihany mantsy no hatahoran’ity fitondrana ity sy to teny eo anatrehany. Tsy miresaka amin’ny tsy manam-basy ny mpitondra Tetezamita ary tsy miresaka amin’ny manam-basy kanefa tsy manana fahavononana hampiasa izany basy izany hamoretana vahoaka rahateo koa. Adinon’ireo Eveka nanao sonia iny fanambarana iny tanteraka izay lafiny iray izay. Tsy mpitondra fivavahana velively mihitsy no ndeha hampitahotra na hampihemotra fitondrana miorina ambony basy.
Hanafatra fitaovam-piadiana indray koa mantsy ny filoha Andry Rajoelina, hanampiana ny efa eo am-pelatanana hiadiana amin’ny asan-dahalo. Tsy lavorary mantsy raha ny fitarainan’ireo be kintana ao anivon’ny Foloalindahy ireo fitaovam-piadiana nentina tany Atsimo. Tsy miandry ela tokoa ny fitondrana amin’ny famaliana ireo karazam-pitakiana avy amin’ny Foloalindahy; fanomezana firy izay efa azon’ny Tafika nandritra ity Tetezamita ity izay!
Marina tsy ilàna fanadihadiana tahaka ny raharaha Zakariasy ny fanambarana nataon’ny fiombonamben’ny Eveka saingy tsy misy mpihaino satria tsy manam-basy. Izy ireo indray aza no mety hahazo fandrahonana sy fampihorohoroana tahaka ny nanjo ireo rehetra nitory ny tsy fiteny sy niteny ny tsy fitory nanomboka ny taona 2009. Marina loatra ange ny voalazan’ny Fiangonana hoe “ny konsiansy mihitsy no maty” e! Ny dikan’izany dia hoe “tsy hiraharaha izay voalazan’ireo Eveka velively ireo mpitondra niantefan’ny fanambarana”.
Fepetra roa ihany no takian’ny mpitondra: manam-basy ary sahy mampiasa izany basy izany amin’izay baiko midina rehetra avy any an-dapa. Tsy isan’ny olona ary tsy manan-jo na amin’inona na amin’inona rehefa tsy mahafeno ireo fepetra roa ireo. Malaza ary voaresaka tato ho ato ny fifidianana; hatreto aloha dia amin’ny volana may 2013 no hoe hanatanterahana azy. Hiaraha-mahita eto indray fa mbola hanana ny anjara toerany mandritra izany fotoam-pifidianana izany koa ny basy. Iza moa no hiantoka ny fiarovana ireny vata fandatsahambato avy lavitra ireny raha tsy ny mpitandro filaminana tompon’ny basy?
Ho fotsy rora eo fotsiny izay rehetra mitabataba ny tsy mety mandritra izao Tetezamita izao. Tsy mihaino afatsy tsy izay manam-basy ity fitondrana ity; izay manam-basy irery ihany!