Zakany foana e !

21/11/2012

Nitokona tsy niasa ny zotra an-drenivohitra omaly tontolo andro. Tonga tany am-piasanany daholo ihany anefa ny ankamaroan’ny olona na dia nisy aza ireo nanararaotra izany mba tsy handehanana miasa; toraka izany koa ny mpianatra. Tena hafa kely samy olombelona mihitsy isika Malagasy, mbola noporofointsika indray mantsy iny omaly iny fa zakatsika daholo izay mety endrika famoretana na fairano atao amintsika e ! Mampihaiky an-dry zareo vazaha sy Afrikana mihitsy ny toetra amam-panahintsika Malagasy.

Inona no tsy efa nanjo an-dRamalagasy nanomboka ny taona 2009 (tsy fisian’asa, tsy fisian’ny fandriampahalemana, tsy fisiam-bola, tsy fihinanan-kanina,, sns) fa mbola tsy mahataitra azy izany; zakany foana e! Miharihary tahaka ny vay an-kandrina ny elanelana eo amin’ny manana sy ny mahantra saingy tsy manaitra azy izany. Manjakazaka ny jadona sy ny tsy refesi-mandidy kanefa dia toa rano natondraka an-damosin-gisa avokoa izany rehetra. Vaky vava ireo mitonona ho mpandinika sy avara-pianarana satria mifanohitra tanteraka amin’ny laojikan’olombelona ny fihetsika sy ny toetran-dRamalagasy.
Ny vary nampanantenaina ho 500 Ar ny kilao lasa 500 Ar ny kapoaka, fa mbola mety amin-dRamalagasy daholo izany rehetra izany, mainka moa fa izay fitokonan’ny mpitatitra an-drenivohitra! Mbola ho avy koa raha izao no mitohy ny fahatapahan’ny jiro sy rano; minoa ahy ianareo fa mbola tsy misy dikany amin’ny Malagasy izany. Inona àry izany no zavatra tsy zakatsika e? Fanontaniana tena saro-baliana tanteraka. Na ireo mpitondra niongana teo amin’ny fitondrana aza mbola manofy ratsy hatramin’izao satria tsy nanam-po ny hianjera teo amin’ny sezany. Ny zavatra nataon’ny teo aloha ihany mantsy izao haverin’ny fitondrana Rajoelina izao koa nahoana hoy ireo mpanadrohadro no tsy mety mianjera sy mirotaka ny olona?
Tsotra ny valiny, tsy karazan’olona azo hanaovana kajikajy ny Malagasy ary manana toetra amam-panahy hiavahany amin’izao tontolo izao. Ny Anjara sy ny Vintana ary indrindra ny Lahatran’Andriamanitra no mibaiko ny fiainany. Zakany avokoa izay rehetra miseho sy atao azy saingy amin’ny fotoana iray tsy ampoizina mihitsy kosa no hirehetan’ny afo dia izay…tongotra mby an-dakana tsy mety ny dia raha miverina.
Sambatra samy sambatra mihitsy ny mpanao poltika eto amintsika manana ity vahoaka Malagasy ity. Tenenina hoe havia dia mankany an-kavia; atoro hoe havanana dia mankany an-kavanana; asaina mipetraka dia mipetraka; tefahana amin’ny takolany havanana dia manome ny takolany havia, vokisana lainga sy fampanantenana poak’aty dia mandrezatra, rohizana eny amin’ny Fitsarana dia mibaboka ho meloka, sns. Zakany e! Zakany foana e! Fa izao: any amin’ny tsy mivonto hatrany no mazàna manaintaina amin-dRamalagasy ary lozan’izay nihavian’izany!