Voalohany sady farany !

22/11/2012

Efa ho vita hono ny kianjan’Antsonjombe ary dia mibitabitaka tahaka ny zanaka akoho mahita rehoka ny fitondrana ary ireo mpanompony. Asa aloha izay hevitry ny artista mikasika io kianja io fa raha ny zava-misy no jerena dia toa mampanahy ihany. Ny kianjan’Antsahamanitra aza tsy fenon’ny mpanakanto intsony raha tsy artista maro no indray mitambatra manao fampisehoana amina vidim-pidirana miray dia mirary. Ilay fahefa-mividin’ny olona mihitsy mantsy no ambany dia ambany. Aleon’ny mpanakanto manao fampisehoana anaty efitrano kely mba ahafahana mampiakatra ambonimbony kokoa ny vidim-pidirana sy ahazoana antoka fa ho lafo avokoa ny tapakila natonta.

Etsy an-danin’izany, tsy misy mangaraharaha mihitsy ny vola nolaniana nanamboarana io kianja io fa dia kiantranoantrano teo amin’ireo mpandraharaha mamy hoditra sy mpiara-misôsy amin’ny mpitondra fotsiny ihany. Indray andro any isika mety mbola handre fa tsy voaloan’ny fanjakana tanteraka ny volan’ny orinasa niantoka ny fanamboarana io kianjan’Antsonjombe io. Satria nahoana, tsy misy mahalala izay saran’ny fanamboarana azy isika, mitovy tamin’ny “silo” naorin-dRavalomanana Marc ao Vohidiala.
Nohenjehina noho ireo lalana tamina kilometatra maro nosokafany nanerana ny Nosy ny filoha teo aloha Marc Ravalomanana. “Azo hanina ve ny lalana?”, hoy ireo mpanohitra tamin’izany fotoana. Hanenenana mihitsy anefa izany ankehitriny raha tsy hiresaka afatsy ny lalan’Itaosy. Miholakolana mihitsy ny fiarakodia ary haingana dia haingana ny fahasimban’ireo piesy noho ny haratsin’ny lalana. Ankehitriny, mipetraka koa ny fanontaniana manao hoe: “azo hanina ve io kianjan’Antsonjombe io?”. Tena noana tokoa mantsy ny vahoaka amin’izao fotoana. Diso fihaino angaha ny olona fony mbola teny amin’ny kianjan’ny 13 may; tsy ny kilao akory no 500 Ar fa ny kapoaka!
Etsy an-danin’izany, homena an’iza indray koa ny fitantanana io kianjan’Antsonjombe io sa mbola ireo mpandraharaha nahazo ny tsena tamin’ny fanamboarana azy ihany no mbola hisahana izany? Fa tena laharam-pahamehana tokoa ve aloha io kianjan’Antsonjombe io, eo anatrehan’izao fahantrana mianjady amin’ny vahoaka izao? Tsy nisy zavatra hafa tena miantraika amin’ny fiainam-bahoaka azo natao tamin’ny vola nanamboarana azy io mihitsy ve? Marina tokoa fa nahatafita ny filoha Rajoelina ny maha DJ azy; saingy tsy amin’ny alalan’ny fampandihizana fitombenana loatra no lalana tsara indrindra hampandrosoana ny firenena.
Ho faly sy ravo ery izao ireo vahoaka madinika mora fahanan-dalitra amin’ny fitokanana io kianjan’Antsonjombe io (mandritra ny propagandy); ho maimaim-poana rahateo koa ny fidirana. Saingy ny hadinon’izy ireo dia izao: amin’io fotoana io no voalohany sady farany hanitsahan’izy ireo izany kianja izany. Tsy ho takatry ny ambany tanàna mihitsy ny vidim-pidirana ao.