Fifidianan’ny mpanam-bola !

24/11/2012

Efa manomboka sahady ny fampielezan-kevitra sy ny propagandy na mbola tsy fantatra mazava akory aza ny daty hanatanterahana ny fifidianana. Azo heverina araka izany fa ho isan’ny kandidà amin’ny fifidianana izay ho filohan’ny Repoblika faha-efatra ny filohan’ny Tetezamita Andry Rajoelina. Mbola ilay fomba amam-panao teo aloha ihany anefa no miverina ; tsy inona izany fa ny fizarazarana vary sy vola ary indrindra ny fitokanana zava-bita tahaka ny nataon’ireo kandidà lasa filoham-pirenena teto hatramin’izay.

Raha tsorina ny resaka dia izay manam-bola sy manan-katao hatrany no manana tombon-dalana amin’ny fifidianana eto amintsika. Tsy androany na rahampitso velively ny Malagasy no hifidy olona iray avy amin’ny alalan’ny programa izay harosony. Porofon’izany ny fifidianana tamin’ny taona 2001 fototry ny krizy 2002. 4L isam-baravarana no nampanantenain’ny filoha teo aloha Marc Ravalomanana, niampy ny teny baiko hoe “minoa fotsiny ihany”. Tsy nisy na dia fehezanteny iray aza namaritra ny programan’asany amin’ny fotoana hatongavany eo amin’ny fitondrana. Avy hatrany dia nanaraka azy ny vahoaka leon’ny fitondran’ny amiraly Didier Ratsiraka. Vola be amina miliara rahateo koa no natontony tamin’ny propagandiny nanerana ny Nosy.
Tsy dia lavitr’izany koa anefa izao ataon’ny filoha Rajoelina izao. Manam-bola mihitsy ity filohan’ny Tetezamita ity tato anatin’ny fotoana fohy ary nasehony mihitsy izany amin’ny alalan’ny fizarana vola ho an’ireo mpanao rugby, ny filoham-pokontany eto an-drenivohitra, sns. Avy aiza ireny vola be ireny? Iza marina no tena mpanondrana ny harena an-kibon’ny tany toa ny vatosoa sy volamena eto amintsika? Fifandrifian-javatra ve ny firenan’ny fizarana ny Vary Mora sy ny fahalafosan’ny Air Force One II?
Tsy misy valiny avokoa izany fanontaniana tsy afaka am-bavan’ny maro izany. Ny zava-misy hita maso dia fifidianan’ny manam-bola indray no hiandry ny vahoaka Malagasy atsy ho atsy. Manomboka amin’ny famerana ny antoka tsy maintsy haloan’izay hirotsaka ho kandidà izany. Olona manam-bola araka izany no afaka hiatrika ity hazakazaka iray ity; tsy maintsy amin’ny alalan’ireo manam-bola ho hisafidianan’ny vahoaka izay ho filoha hitondra ny firenena. Ny tantara anefa dia milaza fa tsy nitondra tombotsoa ho an’ny Madagasikara velively ny fifidianana nanjakan’ny fampiasam-bola sy ny fahefana teo am-pelatanana. Izay fifidianan’ny mpanam-bola izay rahateo koa no fototry ny krizy nifandimby niteraka fandatsahan-drà teto amin’ny firenena.