Vaky ny ady

26/11/2012

Azo antoka fa tsy hihemotra tamin’ny fanambarana nataony mihitsy ny Amnesty International, izay nanameloka marindrano ny fihetsika nataon’ireo miaramila sy manamboninahitra nandritra ny hetsika Tandroka tany amin’ny Faritra Atsimon’ny Nosy. Toraka izany koa anefa ny mpitondra fanjakana sy ny Foloalindahy, izay mandà mafy tokoka ny fiampangana natao azy ireo ary nanameloka ihany koa ny Amnesty International. Vaky aloha izan ny ady eo amin’ny roa tonta ; tsy mbola fantatra kosa izay tena manana ny marina satria samy tsy mbola nisy naneho porofo na ny an-daniny na ny an-kilany. Mijanona eo amin’ny fanambarana fotsiny ihany ny fiarovantena sy ny fanafihana ataon’ny tsirairay avy.

Tsy maintsy hitondra zava-baovao eo amin’ny fiainam-pirenena anefa iny fanambarana nataon’ny Amnesty International iny. Mety tsy hahazo hiditra ny sisintanin’i Madagasikara intsony mihitsy ny Amnesty International. Toe efa manome izany kisarisary izany mantsy ireo fanambarana maro avy amin’ny Foloalindahy sy ny ministry ny Rano farany teo ary inoana fa tsy hijanona tamin’ireny fotsiny ihany ny fanankianana sy ny fanamelohana avy amin’ireo antoko sy mpanao politika mpomba ny fitondrana Rajoelina.
Mahavariana tokoa fa tsy misy miresaka firy ny zava-nitranga tany Atsimo ireo olobe sy Tangalamena avy any an-toerana. Marina tokoa àry ve ny zava-boalazan’ireo manamboninahitra niantsoroka ny hetsika Tandroka fa tena nahafa-po ny vahoaka ny fidinan’izy ireo tany sy ny nandravana ny tariky Remenabila?
Nambaran’ny mpitondra ary ireo tomponandraikitra avy amin’ny Foloalindahy fa tsy nidina tany an-toerana akory ny Amnesty International fa nihonona fotsiny tamin’ny resaka an-dalambe ka tsy nahafantatra izay tena marina tamin’ny zava-nisy tany Atsimo. Mety misy maha marina izany tokoa kanefa tsy azo lavina ary hiaraha-manaiky ny fivoaran’ny teknolojia toa ny fampiasana ireny zanabolana ireny, koa amin’ny maha fikambanana iraisam-pirenena ny Amnesty International dia azo heverina tsara mihitsy ny hoe nisy nanampy tamin’ny fanagonam-baovao izy ireo avy tamin’ny alalan’ny fampiasana ireny fitaovana ary fomba ireny.
Fehiny, ny vahoaka sahirana tsy manana mpiahy hiharan’ny tsindry hazolena no matiantoka ao anatin’izany ady eo amin’ny mpitondra sy ny Amnesty International izany. Iza intsony moa no hanome Tanana azy ireo rahatoa ka tsy afaka ny hanao ny asany eto amintsika intsony ity fikambanana iraisam-pirenena mpiahy ny zon’olombelona ity?