Gisalahy mangala-ketsa

29/11/2012

Tsy niandry ela akory fa omaly hariva ihany dia tonga ny valin-kafatra avy amin’ireo manamboninahitry ny Tafika Malagasy izay namaly ny fanankianana nataon’ireo masoivoho vahiny azy ireo mahakasika ilay hetsika manokana « tandroka » tany amin’ny faritra atsimon’ny Nosy. Na dia tsy nanao an’iny fanambarana iny anefa izy ireo dia tsy vitsy ireo efa naminavina fa tsy maintsy handà ny fanankianan’ny masoivoho vahiny ireo manamboninahitry ny tafika Malagasy.

Raha jerena tokoa ny votoatin’ny fanambarana nataon’izy ireo, ary navoakan’ny ministeran’ny Serasera, dia hita taratra fa mbola nanamafy hatrany ny filazana fa tsy nisy vono faobe araka ny filazan’ny sasany ny zava-nisy tany atsimo nadritra ny hetsika manokana « Tandroka ».
Ny mahagaga amin’ity fanambarana ity dia ny fanondroana manokana ilay tompon’andraikitra avy amin’ny Amnesty International, Christian MUKOSA izay iarahan’ny rehetra mahalala fa nanao fanambarana an-gazety tamin’ny 20 novembre 2012, mikasika ity raharaha any atsimo ity. Voalazan’ny fanambarana nataon’ny mpitarika ny tafika fa tsy niala teto Antananarivo akory ity vahiny ity kanefa milaza fa nahita ny zava-nitranga tany atsimo.
« Hitsikitsika tsy mandihy foana fa ao raha”, hoy ny fahendrena Malagasy. Raha dinihina amin’ireo izay voalaza amin’ilay fanambarana avy amin’ny mpitandro filaminana dia toa hita taratra fa maika dia maika izy ireo ny hilaza fa tsy ilaina ny hanaovana ilay fanadihadiana maokana sy tsy mitanila izay notakian’ny masoivoho vahiny ary efa neken’ny Praiminisitra lehiben’ny Governemanta. Toa hita taratra amin’ny fanambarana izay nataon’izy ireo fa tsy misy antony tokony hanaovana izany intsony. Ekena anefa fa tsy nilaza mivantana an’izany izy ireo.
Na izany na tsy izany, ny fandàvana tsy hifanome tànana amin’ny mety hanatanterahana an’ity fanadihadiana tsy mitanila izay tarihan’ny Firenena Mikambana ity dia milaza mazava ny finiavana hanakona ny tena marina sy tsy hisian’ny mangarahara amin’ity raharaha ity. Ary rehefa tsy misy ny mangarahara dia mazava loatra fa misy tokoa ny zavatra hafenina. Tsy ny filazana fa manara-dàlana sy manaraka baiko an’ireo miaramila nalefa tany atsimo akory no ahafahana milaza fa tsy nisy vono olona tany. Torak’izany ihany koa ny filazana fa tao anatin’ny fanajana ireo fitsipika iraisam-pirenena ny fanatanterahana ny opération tandroka. Satria na nisy izany na tsy nisy dia mbola manankery lavitra noho izany ny fanadihadiana iarahana amin’ny fianankaviambe iraisam-pirenena.
Arak’izany, raha misy tokoa ny finiavan’ireo mpitandro filaminana ny hanjakan’ny fahamarinana sy ny rariny eto amin’ny firenena ary ny mba hivoahan’ny marina izay hampilamina ny sain’ny be sy ny maro dia ny fanambaràna milaza ny fahavononany hanamora ny fanatontosana izany fanadihadiana izany no tokony nataony. Mety mba hanatsara bebe kokoa ny endrik’izy ireo eo anatrehan’ny vahoaka sy ny fianankaviambe iraisam-pirenena ny filazana fa vonona ny hanamafy izany fanadihadiana izany izy ireo.