« Gendarmes au sud » !

30/11/2012

Mangataka fanadihadiana iraisam-pirenena mikasika ny raharaha any Atsimo ny Amnesty International; toraka izany koa ny fianakaviambe iraisam-pirenena izay nasaina hijery ilay horonantsary visa C teny Mahazoarivo. Tsy mahatsindry tsihy mihitsy ny fitondrana; manofy ratsy ny Foloalindahy. Fa inona no olana?

Inona tokoa no olana amin’izany fanadihadiana iraisam-pirenena izany raha tena madio saina sy tanana ny fitondrana e? Tsy aleo ve sokafana izany fanadihadiana izany amin’izay vasoka tsara eo ny Amnesty International izay nampiantso izany raha tena milamin-tsaina tsy nandika lalàna ireo miaramila nalefan’ny filoha Rajoelina tany Betroka? Te hividy ny lohany tokoa ireto manamboninahitra ireto kanefa matahotra ny masony. Ny vy hoy ny Ntaolo tsy mba mikintrana irery izany fa misy antony.
Mpanao politika mpomba ny fitondrana daholo mantsy izao no nandray fitenenana sy nasaina niteny, mikasika ny raharaha any Atsimo. Aleo indray mba ireo olona manana fitarainana noho ny zava-nanjo azy nandritra ny “opération” Tandroka no hiteny. Sarotra ihany anefa izany satria tsy maintsy midina any an-toerana mitafa mivantana. Ny olana nefa tsy misy mpampanofa fiara sahy midina any Betroka; raha misy aza dia sady lafo no mametraka fepetra maro dia maro karazan’ny efa mandà an-kolaka. Toa lasa adihevitra handrebirebena saim-bahoaka ity resaka any Atsimo ity; sokafana fotsiny ilay fanadihadiana dia ho hita eo izay mandainga sy izay miteny ny marina. Inona no olana amin’izany?
Mahay manodinkodina saim-bahoaka mihitsy ireto mpanao politika sy mpitolona manao fanamiana ireto. Inona no mampitahotra ny Foloalindahy amin’izany fanadihadiana izany na fianakaviambe iraisam-pirenena no hanao azy na zanaka am-pielezana na dôrkasy! Misy raha ao matoa mitaintaina tahaka izao ireo manamboninahitra voakasik’izany. Sa ny diksionera Larousse sy Robert indray no hahazo tsiny amin’ny famaritana ny atao hoe “génocide”?
Tsy misy mahay noho isika Malagasy mantsy taorian’ny taona 2009; na teo amin’ny fitantanam-bolam-panjakana izany na ny fampiharana ny lalàna, na koa ny fampanjakana ny demôkrasia sy ny fitandroana ny zon’olombelona. Hafa ny mantsy famaritan’ny vazaha izany antsoina hoe « génocide » ary hafa kosa ny antsika Malagasy. Tsy azo sokajiana ho « génocide » (ho antsika Malagasy irery ihany io an !) rehefa ny samy fokonolona no mifamono. Avy amin’ny fitambaran’ny teny hoe “gendarmes” sy ny hoe “sud” mantsy no nihavian’ny “génocide”. Izany hoe “fokocide” no nisy tany Atsimo satria samy fokonolona no nifamono tany. Ka inona no olana amin’izany, asaina hovan’ny Larousse sy Robert fotsiny ny famaritana io teny miteny resabe eto amintsika io dia vita.