Haingo ambony tsikoko !

01/12/2012

Tsy ho ela raha ny fijery azy dia ho vita avokoa ireo tetikasan’ny fitondrana Tetezamita toa ireo hôpitaly manara-penitra, kianja fanaovana rugby ary ny kianjan’Antsonjombe ; tsy ho ela araka izany koa ny fitokanana ireny fotodrafitrasa rehetra ireny.

Tsara jeren’ny maso daholo ireo rehetra voatanisa ireo saingy toa haingo ambony tsikoko ihany hoy ny fitenenana. Toa entina hanakonana ny fahantrana sy ny fahalovana ary indrindra ny afera maizina eto amin’ny firenena ireny fotodrafitrasa ireny. Mpandraharaha akaikin’ny fitondrana avokoa no nahazo tombotsoa tamin’ny fanatanterahana ny asa ary tsy misy mangaraharaha mihitsy ny momba azy ireo.Toa entina hamitahana ny mason’izao tontolo izao hilazana fa tena miasa tokoa ny fitondrana Tetezamita kanefa vahoaka mosarena sy fiaraha-monina hanjakan’ny jiolahy no ao ambadik’izany. Mihaingo ambony tsikoko no azo hilazana ity fanjakana ity. Ny fisehoana ivelany no laharam-pahamehana; tsy fampiseho masoandro kosa ny ao anatiny. Manaporofo izany ny zava-misy ao amin’ny Air Madagascar. Fatiantoka tsy misy ohatra izany no hita nandritra ny “bilan” farany teo; mamitaka ny maso anefa ny fahitana ny fividianana ireny Airbus ireny; toa milaza fa salama tsara tokoa ity kaompania iray ity. Toraka izany koa ny Jirama ary ireo orinasam-panjakana maro izay lasa boatin-draikitra fakan’ny mpitondra vola.
Tsy maintsy hiboridana daholo izany rehetra izany aoriana ao; hivandravandra amin’izay ireo tsikoko matevina tsy laitran-tsavony. Sahala amin’ny tovovavy meva iray, miravaka sy manitra ary mitafy akanjo sarobidy voadonan’ny fiara ka any amin’ny hôpitaly vao tsy takona nafenina intsony ny kilaoty rovitra sy ny tsikoko amin’ny vatana. Ohatra izany koa ny tovolahy jejo iray narary an-dalana ka tany amin’ny dokotera vao nipoitra tsy fidiny ilay “bà” goaka sady mamofona manafaka gripa.
Misy farany daholo ny zava-drehetra; tsy maintsy hibaribary amin’ny vahoaka ny tsikoko navelan’ity fitondrana Tetezamita ity. Tahaka izany hatrany ny zava-nisy teto amin’ny firenena; aorian’ny fialan’ny mpitondra vao mitsinkafona sahala amin’ny diky nentin-driaka ny tsikoko nafenina tamin’ny alalan’ireo fisehoana ivelany nandrebirebena ny valalabemandry. Haingo ambony tsikoko avokoa ireo hitan’ny maso hotokanana tsy ho ela ireo; entina hamitahana indray ny vahoaka izay efa zatra voafitaka ary mbola ho voafitaka hatrany mandra-pahatapitry ny ainy.