Miala !

07/12/2012

Fa inona no ataon’ny minisitra ary ireo mpiara-miasa aminy ao amin’io ministeran’ny Asa Vaventy io e? Handrasanareo ho faty daholo ve ny vahoaka vao handray andraikitra ianareo ireo sa variana “mi-bizna” fotsiny! Im-piry izay nilazan’ny hainoamanjery ny loza mitatao ho an’ireo mpampiasa ny tetezan’Ampasika. Efa mihozongozona io tetezana io ho an’izay mahatsapa izany, indrindra amin’ny fitohanan’ny fifamoivoizana. Ny fefy vy efa tapitra tapaka; ny sisin-tetezana lasa tsena tsy misy handehanan’ny mpandeha an-tongotra. Aiza ilay ministeran’ny Asa Vaventy? Firy akory ireo sampanan-dalana tsy misy takela-by miteraka loza; lasa tsianjery sisa no ataon’ny mpamily.

Tokony mba hanana ny antsoina hoe “sens de l’honneur” hametra-pialana ny minisitra sy ny kabinetrany rehefa tsy mahavita azy e! Hamono vahoaka tahaka izao no hanakaraman’ny olom-pirenena an-tapitrisany ireo minisitra sy mambra ny kabinetra amin’ity fitondrana Tetezamita ity? Endrika famonoam-bahoaka izao tsy fandraisana andraikitry ny ministeran’ny Asa Vaventy izao.
Mitodika any amin’ireo injeniera maro be ny mason’ny mpanara-baovao. Tsy mahatsiaro tena ho tomponandraikitra tamin’iny loza nahafatesana zaza amam-behivavy am-polony maro iny ve izy ireo? Tsy afaka ny hisoroka izay loza mety hanjo ny vahoaka mihitsy ve izany ireo tomponandraikitra be voninahitra sy miterinterina amin’ny 4x4 eto amintsika ireto? Voaporofo mihitsy izao fa tsy miraharaha izay tena zava-misy ifotony iainan’ny vahoaka ny mpitondra fanjakana; inona anefa no tsy hametrahana fialàna rehefa tsy mahay sy tsy mahafantatra ny asa nankinina taminy, na dia ho fialan-tsasatry ny fanahin’ireo namoy ny ainy fotsiny ihany aza!
Izany ry vahoaka no zava-misy eto amin’ity firenena ity. Variana amin’ny “bizna” avokoa ireo tomponandraikitra karamaina an-tapitrisany amin’ny volam-bahoaka kanefa tsy misaina na iray minisitra monja aza ny fiainana andavan’andron’ny vahoaka.